2025 йил 2 февраль куни истеъдоди, харизмаси ва бетакрор услуби билан бутун дунёни забт этган хонанда Шакира таваллуд кунини нишонлади. Ундаги мафтункор овоз, пластик рақслар ва Лотин Америкаси, араб ва поп-мотивларнинг бетакрор уйғунлиги хонандани замонавий мусиқа рамзига айлантирди.
Юлдузнинг туғилиши
Уилям Мебарак Шадид асли ливанлик бўлиб, болалигидан шифокор бўлишни орзу қиларди. Бироқ у шунчалик шубҳага берилувчан эдики, рисоладагидек ишлашнинг ҳам уддасидан чиқа олмасди, чунки умр бўйи ўзига турли касалликларни ўйлаб топиб, уларни даволаш учун ичиши керак бўлган дориларни ҳам ўзи белгиларди.
Кейинчалик у заргарлик буюмларини сотишга қарор қилиб, Нью Йоркда кичик дўкон очади, аммо омади келмайди. Шахсий ҳаётидаги муаммолар эса уни бутунлай гангитиб қўйганди.
Саккиз фарзандни дунёга келтирган биринчи хотини вафотидан сўнг, Уилям Мебарак Колумбиядаги Барранкилля шаҳрига кўчиб ўтади ва бу ерда ҳам заргарлик дўконини очади. Унга сотувчи сифатида ёлланган испан ва италян миллатига мансуб ёш Нидия Риполл Торрадо кейинчалик унга турмушга чиқади — уларнинг Шакира Изабел Мебарак Риполл исмли қизи туғилади.
Шакира оиланинг ягона фарзанди бўлиб, лекин отасининг олдинги никоҳидан саккизта ўгай ака-опалари бор эди. У болалигидаёқ қобилиятларини намоён қила бошлаган, мусиқа ва шеърларни яхши кўрар, отасига ўхшаган ёзув машинкаси бўлишини орзу қиларди. Тўрт ёшидаёқ у қорин рақсини шу қадар нафис ижро этардики, унинг рақси ҳаммага ёқарди; 7 ёшида у шеър ёза бошлайди, 8 ёшида эса отасининг касодга учраши туфайли биринчи изтиробни бошдан кечиради. Ўшанда ота-онаси уйдаги ҳамма нарсани сотишга мажбур бўлишган, ҳатто кондиционерларни ҳам.
Ота-она қизининг одатий дунёсининг тамомила барбод бўлганини унутишга ҳаракат қилиб, Шакирани уйсиз болалар қандай яшаётганини кўришга олиб боришади. Қизча ҳаммасини тўғри тушунади. Йиллар ўтиб қўшиқчи муҳтож болаларга ёрдам бериш учун хайрия жамғармасини тузади.
Шакира болалигидан отаси тез-тез ижро этадиган араб мусиқасини тинглаган. Шунингдек, у қорин рақсларини ижро этаётган қизларни томоша қилишни жуда яхши кўрарди ва уларнинг ҳаракатларини жуда аниқ такрорларди. Бу санъат кейинчалик унинг ўзига хос хусусиятига айланди. 10 ёшида Шакира кучли овози билан эътиборни ўзига жалб қилиб, маҳаллий танловларда қатнаша бошлади, уч йилдан сўнг эса Sony Music Colombia билан биринчи шартномасини имзолайди.
Унинг биринчи альбомлари муваффақият қозонмайди, аммо ёш қўшиқчи мусиқа яратишда давом этади ва танаффусдан сўнг Pies Descalzos альбомини тақдим этади, бу эса уни Лотин Америкасида машҳур қилади. Кейинги альбом бу муваффақиятни мустаҳкамлайди ва унда янграган араб оҳанглари ёш хонанданинг ташриф қоғозига айланади.
Унинг инглиз тилидаги “Whenever, Wherever” ва “Underneath your Clothes” сингллари бутун дунё бўйлаб хитга, ўзи эса машҳур юлдузга айланади. У Колумбия телесериалида рол ўйнайди, лекин тез орада кино у учун эмаслигини англайди.
Илк умидсизлик
Хонанда биринчи марта актёр Освалдо Риосга кўнгил қўяди. У Шакирадан 16 ёш катта бўлиб, сериалларда рол ўйнаган ва икки марта турмуш қурган эди. Тажрибасиз қиз эса унда орзусидаги оқ отдаги шаҳзодани кўрди. Актёрнинг собиқ хотинларидан бири уни оилавий зўравонликда айблаб, ҳатто суд орқали товон пули ундирганига қарамай, бу ҳолат қизни заррача ташвишга солмайди. Дарҳақиқат, Освалдо дастлаб хонандага жуда эътиборли эди: унинг барча истакларини олдиндан сезар, унга чин кўнгилдан яқин одам бўлиб туюларди. Бироқ унинг Шакирага бўлган муносабати бутунлай сохта бўлиб чиқди — у шунчаки қўшиқчидан ўз шуҳратини ошириш учун фойдаланганди.
Ўрганган кўнгил ўртанса қўймас деганларидек, актёр яна хиёнат кўчасига киради. Шакира эса буни тушунтиришни талаб қилганда Освалдо одатдагидек ёлғон гапира бошлайди. Бу сафар Шакира унга ишонмайди ва муносабатларига нуқта қўяди.
2000 йилда Шакира Аргентина президенти Фернандо де ла Руанинг ўғли Антонио де ла Руа билан танишади. Шакира бахтли эди, у интервьюларида Антониони идеал эркак деб таърифлайди. Антонио Шакира учун нафақат севгилиси, балки ҳақиқий таянчига айланади. Эркак унинг карьерасида фаол иштирок этиб, бизнес маслаҳатчиси вазифасини бажаради. Шакира севгилисига турмушга чиқишни орзу қиларди, бироқ тўй санаси ҳақидаги саволларга доимо ҳазил билан жавоб берарди.
Улар танишганидан бир йил ўтгач, Антонионинг отаси шарманда бўлиб, президентлик лавозимидан четлаштирилса ҳам, Шакира ўз обрўсига путур етказмаслик учун йигити билан алоқасидан воз кечмади. Ҳатто Аргентинада альбомларини сотиш тақиқланганда ҳам эътибор бермайди.
Аммо 2011 йилда улар ажралишаётганини эълон қилишганда ҳамма ҳайратда қолди. Ажралиш сабаблари маълум эмас, лекин миш-мишларга қараганда, Шакира эрининг хиёнатидан чарчаган. Ажралишдан сўнг Антонио Шакирани судга бериб, унинг карьерасига қўшган ҳиссаси учун 250 (кейинчалик яна 100) миллион доллар товон талаб қилади. Бироқ суд уларнинг муносабатлари бизнес юзасидан эмас, шахсий эканлигини айтиб, унинг даъвосини рад этади.
Ёлғон муҳаббат
Кўп ўтмай, Шакира испаниялик футболчи Жерар Пике билан учраша бошлайди. Улар 2010 йилда футбол бўйича жаҳон чемпионатининг расмий мадҳияси бўлган Wаka Wаkа клипини суратга олиш пайтида танишган.
Жерар ўзининг харизмаси ва ҳазилкашлиги билан қўшиқчининг эътиборини дарҳол ўзига тортди. Уларнинг романтикаси тез ривожланиб, улар дунёдаги энг кўп муҳокама қилинадиган жуфтликлардан бирига айланади. Футболчининг ўзидан 10 ёш кичиклиги Шакирани мутлақо чўчитмасди улар ҳақида нима дейишаётгани унга мутлақо аҳамиятсиз эди, у Пикени қуёшим деб атарди.
У Жерар ўйнайдиган Барселонага унинг ортидан кўчиб ўтади. Собиқ севгилиси Антониодан фарқли ўлароқ, у севгидан бошқа ҳеч нарса талаб қилмаслигидан мамнун эди. Шакира бир неча бор Жерар унинг илҳом манбайи бўлганини таъкидлаган. 2013 йилда уларнинг биринчи фарзанди Милан, 2015 йилда эса иккинчи ўғли Саша дунёга келади. Қўшиқчига расмий никоҳ ҳақида саволлар берилганда, у оила қуриш учун паспортдаги муҳр мутлақо шарт эмаслигини айтарди. Аммо бир куни Шакира турмуш қуришни истамаслиги ҳақидаги баёноти билан мухлисларини ҳайратда қолдиради.
Унинг сўзларига кўра, у учун расмий никоҳ муҳим эмас, бундан ташқари, Жерардан шубҳаланишга асос йўқ. У ажойиб ота бўлиб, ўғилларига ғамхўрлик қилар, шу билан бирга севгилисини ҳам унутмасди. Жерар Шакира овозини йўқотганда ҳам, тушкунликка тушганда ҳам уни қўллаб-қувватлади, унинг ҳиссиётларига чидади ва ёрдам керак бўлганда доим ёнида бўлди.
Бир куни касал отасига бир неча кун қараб, кейин уйига қайтган хонанда музлаткичдаги қулупнай мураббосининг ярми бўш банкасига кўзи тушади... Жерар ҳам, ўғиллари ҳам бу мураббони умуман ейишмасди... Шакира у йўқлигида уйида бошқа аёл бўлганини ва у аёл бу ерда бемалол яшаганини дарҳол тушунади. 2022 йилда эса эр-хотин ажрашишини эълон қилишади. Кейинчалик оммавий ахборот воситалари мазкур ажралишга олиб келган Пикенинг кўплаб хиёнатлари ҳақида ёзади.
Қайта оёққа туриш
Хонанда интервьюларининг бирида хиёнат сабаб унинг дунёси барбод бўлганини айтади. “Мен оилам учун, муҳаббатим учун карьерамни қурбон қилдим ва охир-оқибат ўзлигимни йўқотдим” деб тан олади у. У ҳафсаласи пир бўлганини яширмайди: “Мени ахлатдай улоқтиришди”. Шакиранинг айтишича, у бир неча бор ғазаб, нафрат туйғуларидан азобланган. У бу дард билан яшашга ўрганди ва ниҳоят, қайта тикланиш босқичига етди. Мусиқа унга умидсизлик ботқоғидан чиқишга ёрдам берган нажотбахш кучга айланди.
Шакира Майамига кўчиб ўтди, мусиқа ёзиш ва ўғилларининг тарбиясига эътибор қаратди, энди у ёлғиз она эканини ва кимнингдир ёрдамига муҳтожмаслигини англашга ҳаракат қилди. 2023 йилда қўшиқчи бир нечта муваффақиятли трекларни чиқарди ва унинг Бизаррап билан ҳамкорликда куйлаган қўшиғи YouTube’да кўришлар сони бўйича рекорд ўрнатди.
2024 йил баҳорида хонанданинг янги муносабатлари ҳақида миш-мишлар тарқалди, бу сафар “Эмили Парижда” телесериалидаги роли билан танилган 31 ёшли актёр Люсен Лавискоунт билан. Шакира бу гап-сўзларга ҳеч қандай изоҳ бермади. Бир мунча вақт ўтгач, жиддий муносабатлар ҳозирча унга мутлақо бегоналигини айтди.
Ҳақиқатда у олган сабоқларини унутмаган ҳолда яшашни ва карьерасини давом эттиришни истайди. “Мен ўйлаганимдан анча заифман. Мен доим оғриқдан қўрқардим, чунки чидай олмасам керак, деб ўйлардим”.
Бир вақтлар Шакир ва Жерар Пике идеал жуфтлик деб ҳисобланган, чунки улар бир кунда туғилган, фақат 10 йил фарқ билан, бундай ўхшашликлар юлдузлар оиласида камдан кам учрайди.
Изоҳ (0)