“Морена Клара” эфирга узатилганига 30 йил тўлди. Сериал қаҳрамонлари ҳозир қандай кўринишда? (фото)

“Морена Клара” 1994 йилда Венесуэлада суратга олинган мелодрама жанридаги сериал бўлиб, 1995 йилда экран юзини кўрди. Томошабинлар эътиборини тортган сериал воқеаларга кўра, бош қаҳрамон Клара Роса Гусман ­Санта-Барбара-дел-Сулияда яшовчи бадавлат Эмилиано Андара ва дарёда оқиб кетганлиги учун ўлик деб тахмин қилинган Розалинданинг фарзанди эди. Унинг отаси болани тан олишдан бош тортади ва ҳатто уни кўришни ҳам истамайди. Кларанинг камбағал холаси уни икки ўғли билан биргаликда тарбиялайди. Гарчи қиз яхши ҳаёт ҳақидаги орзулар билан яшаган бўлса-да, оиланинг молиявий аҳволи туфайли кўчада савдо-сотиқ билан тирикчилик қилишга мажбур бўлади.

Айни пайтда Эмилиано Андара мамлакатнинг муҳим кишиси эди, унинг ашаддий душмани Лиссандро Прадога биринчи рафиқаси Монсеррат турмушга чиқади. Ўзи эса иккинчи хотини Эухения билан вафот этган акасининг икки ўғли Валентин ва Францискони тарбия қилади. Валентин эса Прадонинг қизи Линда билан учрашиб туради.

Тўсатдан шаҳарда содир бўлган зўравонлик тўлқини Клара ва Валентиннинг учрашишига сабаб бўлади. Ва шу пайтдан бошлаб уларнинг ҳаётида туб ўзгаришлар юз беради. Чунки бу тўқнашувда пайдо бўлган муҳаббат икки ёшга ҳам бир қатор ҳаяжонли воқеаларга йўл очиб берган эди.

Венесуэланинг энг муваффақиятли телесериалларидан бири Ўзбекистонда ҳам катта қизиқиш билан томоша қилинган. Сериалнинг бош қаҳрамонлари 30 йил ичида қандай ўзгаргани кўпчилик учун қизиқ бўлиши табиий.

Клара Роса Гусман — Астрид Каролина Эррера

Каролина Венесуэланинг пойтахти Каракасда 1963 йил 23 июнда туғилган. Актрисанинг илк фаолияти 1984 йил “Венесуэла гўзали” танловида иштирок этишдан бошланади. Сўнгра “Дунё гўзали” унвонига сазовор бўлди, аммо бу пайтда у актрисалик фаолиятини бошлаш ҳақида ўйлаб кўрмаган. Каролина фақатгина танловларда иштирок этишни ёқтирган. Шундан сўнг унга турли хил рекламалар, роликлар, мода ва телевидениедан таклифлар тушган.

“Рақобат туфайли жуда кам одам бошдан кечирадиган тажрибаларни орттирдим. Менга бутун дунё тож кийдирганди, шу билан бирга масъулият, унвон эгаси бажариши керак бўлган вазифа ҳам юклатилганди. Мен ўзимни тақдир танлаб олган инсон каби ҳис қилдим”, —­ дейди актриса.

Валентин Андара— Луис Хосе Сантандер

Мексика ва Венесуланинг машҳур актёри Луис Хосе Сантандер 1960 йил Каракасда дунёга келган. Аввал оиласи билан Америкага кўчиб кетади. Бир муддатдан сўнг яна ватанига қайтиб келади. Актёр болалигидан жуда кўп касбларнинг эгаси бўлишни орзу қилар эди.

Дастлаб биолог, кейинчалик шифокор бўлишни истаган ва тиббиёт факультетида иккинчи курсгача таълим олган. Кейинчалик муҳандислик йўналишида ўқий бошлайди. 1980 йилдан театрда ўз фаолиятини бошлайди ва 1987 йилдан фильм ва сериалда суратга тушган. Уни дунёга машҳур қилган сериал “Морена Клара” бўлиб, лойиҳадаги иштироки  учун бир қанча мукофотларга ҳам сазовор бўлган.

Андино— Алехандро Мартинез

Сериал қаҳрамонларидан бири Алехандро Мартинез 1966 йил 22 декабрда Колумбиянинг Богота шаҳрида туғилди. 1991 йилда модел Адриана Арболеда билан турмуш қурди. Актёр ижоди давомида 17 дан ортиқ фильм ва сериалларда суратга тушган.

Женнифер— Каролина Кристанчо

Сериалда Женнифер образида намоён бўлган Каролина Кристанчо 1968 йил 17 декабрда Венесуэланинг Каракас шаҳрида дунёга келди. Актриса 10 йиллик ижоди давомида 7 та фильмда ажойиб ролларни ижро этишга муваффақ бўлди. Шунингдек, Каролина ҳарбий маълумотга эга актриса. У Аякуччо ҳарбий лицейида бакалавр босқичини тамомлаган ва ҳарбий муҳандислар олийгоҳида 1 йил ўқиган. Кейинчалик ўзини актёрлик касбига бағишлайди. 1990 йил бўлиб ўтган “Венесуэла гўзали” танловида Каролина олтинчи ўринни қўлга киритади.

Эмилиано Андара— Хулио Мануэл Гарсиа Бастида

Хулио ижодий фаолиятини 17 ёшидан бошлади. Дастлаб у театр учун сценарийлар ёзди, драма мактабини тугатгандан сўнг актёрлик фаолиятини бошлади. 1973 йилда Венесуэлага кўчиб кетган актёр у ерда ҳам театр ва телевидениеда ишлади. Актёр театрда 50 дан ва теленовелла ва киноларда 20 дан ортиқ рол ижро этди.

Линда Прадо— Габриела Спаник

Габриела Спаник 1973 йил 10 декабрда Венесуэлада туғилган. Унинг Даниела исмли эгизак синглисидан ташқари бир акаси ва синглиси бор. Спаникнинг бувиси ва бососи Хорватиядан 1947 йил кўчиб келган. Габи аслида психология бўйича таълим олган бўлса-да, ҳамиша рол ўйнашга қизиқар эди. 1992 йил Габи “Венесуэла гўзали” танловида ғолиб бўлган.

Магдален Валян — Лули Босса

Лули Босса 1963 йил 14 майда Колумбияда туғилган. Актриса кино оламига 1989 йилда кириб келди ва айни дамда унинг 27 дан ортиқ роллари мавжуд.

Лиссандро Прадо— Энри Галуэ

Асли келиб чиқиши ирландиялик бўлган Энри Галуэ “Морена Клара” сериалида Лиссандро Прадо образини гавдалантирган. Актёр 1951 йил 9 февралда Венесуэланинг Маракайбо шаҳрида таваллуд топган.

Монсеррат Прадо— Яхайра Орта

Яхайра Орта сериалдаги энг эсда қоларли образлардан бири — Монсерратни ижро этган. У ижодий фаолиятини 17 ёшдан бошлаган. Актриса умрининг 51 йилини театр, фильм ва TVга ва бағишлади. Яхайранинг бир нафар фарзанди — қизи бор.