Машҳур Болливуд юлдузи Амитабҳ Баччаннинг ўғли бўлишига қарамай, ўз йўлини мустақил равишда босиб ўтиб, кино саноатида мустаҳкам ўрнини эгаллаган Абҳишек Баччан жорий йил 5 февраль куни 49 ёшга тўлди. Қуйида Eastэрн Эе нашри рейтингига кўра Осиёдаги энг ҳушбичим эркак унвонига сазовор бўлган, актёрлик маҳорати ва харизмаси билан мухлисларини ҳайратда қолдиришда давом этаётган Абҳишек Баччан ҳаёт ва ижод йўли ҳақида маълумот берамиз.
Болалик
Абҳишек Баччаннинг ҳақиқий фамилияси Шривастав бўлиб, у оилавий анъаналарга риоя қилган ҳолда Амитабҳ Баччандан ўрнак олиб, Баччан фамилияси билан фаолият юритишга қарор қилди. Унинг онаси Жая Баччан ҳам Ҳинд киносига ўз ҳиссасини қўшган санъаткорлардан бўлган.
Ёшлигида Абҳишек дастлаб иқтисодчи бўлишни истаган, аммо вақт ўтиб санъатга қизиқиши ортган. Бўлажак актёр 1976 йил 5 февралда Мумбай шаҳрида таваллуд топган. Унинг Швета исмли опа бор. Аввал Баччан она шаҳридаги мактабга борди, бироқ бошланғич таълим олиш бола учун қийин кечди, чунки Абҳишек дислексия касаллигидан азият чекар эди.
Дислексия – бу ўқиш ва ёзиш билан боғлиқ неврологик бузилиш бўлиб, одамнинг сўзларни тўғри таниб олиш, уларни тушуниш ва талаффуз қилиш қобилиятига таъсир қилади. Дислексия билан оғриган инсонлар ҳарфларни чалкаштириб қўйиши, сўзларни секин ва қийинчилик билан ўқиши ёки ёзишда хатоларга йўл қўйиши мумкин.
Шунга қарамай қатъият ва машаққатли меҳнат билан ёш Абҳишек таълим олди. Сўнг ўқишни Швейцарияда давом эттирди. Бакалавр босқичини у Бостон университетининг иқтисод факультетида тамомлади. Аммо Баччан актёрликка ҳам катта қизиқиш билдиргани учун соҳасини ўзгартиришга қарор қилди.
Кино саноатига илк қадам
Абҳишек Баччан 2000 йилда 24 ёшда дебют қилди. Унинг “Қочоқлар” (Рефугее) драмасидаги биринчи роли ёш актёр учун муваффақиятли бўлди. Унинг келишган ташқи кўриниши, (бўйи 188 см, вазни 78 килограммдан ошмайди), табассуми ва хуш овози жамоатчиликда катта қизиқиш уйғотди.
Аммо унинг иштирокидаги кейинги лойиҳалар у қадар юқори рейтингга эга бўлмади. Кейинги уч йил ичида Абҳишекнинг фильмографиясида 17 та фильм муваффақиятсизликка учради.
Аммо булар актёрнинг Болливудни забт этиш истагидан кечишга мажбур қилмади, аксинча, Абҳишек Баччан актёрлик маҳоратини оширишга интилди ва мақсадига етишди ҳам.
2003-2004 йилларда “Ишқ ақлимни оздирар” фильми, кейин эса “Тақдирлар чорраҳаси” лойиҳасидаги иккита рол томошабинлар ва танқидчилар томонидан юқори баҳоланди. “Тақдирлар чорраҳаси” даги образи учун Абҳишек Ҳиндистон кино институти мукофотига сазовор бўлди.
2004 йилда Абҳишек “Тезлик”да бош ролни ижро этди ва фильм касса даромадлари бўйича Ҳиндистонда етакчи лойиҳалардан бирига айланди. Актёр ўз муваффақиятини “Банти ва Бабли” (2004) саргузашт комедияси билан мустаҳкамлади. 2005 йилда эса отаси билан биргаликда “Отам изидан” фильмида иштирок этди. Лойиҳа кўплаб мухлислар ва кино танқидчиларнинг олқишига сазовор бўлди ва Ҳиндистон кино институти мукофоти билан тақдирланди.
2007 йилда Баччан “Гуру: Муваффақият сари йўл” фильмида рол ижро этди. 2008 йилда ота-бола Баччанлар “Саркар Раж” криминал драмада яна бир бор ҳамкорликда ишлади. Ушбу лойиҳада Абҳишекнинг рафиқаси Айшвария Рай ҳам иштирок этган.
2010 йилда Абҳишек ва Айшваря яна бир лойиҳада бирлашди: икки машҳур “Ёвузлик” фильмида иштирок этди. Баччан унда асосий ёвуз қаҳрамон ролини ўйнади. 2011 йилда актёр “Дум Мааро Дум” криминал драмасида ишлади. Фильмда Абҳишек ва Айшваря биргаликда ижро этган қўшиқ ва унга ишланган клип бутун Ҳиндистонда хит даражасига кўтарилди.
Актёр иштирокидаги “Тезлик 3” (2013) жангари фильми Болливуднинг энг қиммат лойиҳаларидан бирига айланди. Шу билан бирга, у энг кўп даромад келтирган ҳинд фильмлари рўйхатига кирди.
Шахсий ҳаёт
Биргаликда турли лойиҳаларда иштирок этгандан сўнг Абҳишек актриса Каришма Капурни севиб қолган ва ёшлар ҳатто 2002 йилда унаштиришган. Бироқ 4 ойдан кейин уларнинг муносабатлари узилган. Бунга Ҳиндистон ОАВларида Баччан оиласининг яқин дўсти Амар Сингхнинг аралашувини сабаб қилиб кўрсатган. Бундан ташқари, Каришмага унинг бўлажак турмуш ўртоғи тўйдан кейин кинодаги фаолиятини тугатиш шартини қўйган, аммо у бунга рози бўлишни истамаган.
1997 йилда Абҳишек Баччан Айшваря Рай билан танишиб қолган. Аммо улар орадан бир неча йил ўтгач — фақат “Тезлик 2: Ҳақиқий туйғу” фильмини суратга олиш пайтида яқиндан мулоқот қилишни бошлаган. Уларнинг муносабатлари 2007 йил 14 февраль куни дабдабали тўй билан якунланди.
Маълумотларга қараганда, тўй маросимига 900 минг доллардан ортиқ маблағ сарфланган бу у ўша даврдаги Болливуд учун энг қиммат тўйга айланган. Орадан тўрт йил ўтгач, 2011 йил ноябрь уларнинг оиласида Аарадҳия исмли қизалоқ дунёга келган.
Эр-хотин ҳозирда Ҳиндистондаги кам таъминланган болалар учун хайрия ишлари билан шуғулланади. Айшвария Баччанлар оила аъзолари билан биргаликда Даулат Пур қишлоғидаги камбағал оилалар қизлари учун мактаб қурдирган.
Актриса Айшвария Рай Мумбайда бўлиб ўтган миллиардер Анант Амбани ва Радҳика Мерчант никоҳ тўйига фақат қизи Аарадҳя билан бирга келгани ва у маросим давомида турмуш ўртоғининг қариндошларидан узоқда юргани кўплаб миш-мишларга сабаб бўлди.
Шу сабабли Абҳишек Баччаннинг турмуш ўртоғи билан ажрашиши ҳақида миш-мишлар тарқала бошлади.
Аммо юлдузли жуфтлик сўнгги кунларда тарқалган миш-мишларга жавобан ҳеч қандай изоҳ бермади.
Абҳишек Баччан футболнинг ашаддий мухлисидир. Актёр Ҳиндистон терма жамоаси ва “Ченнайин” футбол клуби ўйинларини кузатиб боради.
Абҳишек Баччан яқинда “Сен билан гаплашиб олишим керак” номли фильмда бош ролни ижро этди. Унда актёр саратон касаллигидан омон қолган Аржун Сен образини гавдалантирди. Фильм 2025 йил 18 январда Prime Видео платформасида намойиш этилди.
Изоҳ (0)