Netflix стриминг тизими “Калмар ўйини” сериали иккинчи қисмининг саҳна орти лавҳалари ҳамда лойиҳага киритилмаган бир нечта кадрларни мухлислар билан бўлишди.
YouTube платформасига жойлаштирилган 20 дақиқалик видеода рэпер Танос (Чхве Сон Ҳён) иштирокидаги қизиқ лавҳалар ҳамда иштирокчилар ўртасидаги қонли жангнинг кенгайтирилган версияси ҳам ўрин олган.
Сериалда Чхве Танос тахаллуси остидаги антагонист ёрқин бинафшаранг соч, бўялган тирноқлар ва ғалати хатти-ҳаракатларга эга гиёҳванд рэпер ролини ижро этган. Қаҳрамон ўзининг ғайриоддий ва қизиқарли образи туфайли 2-фаслда мухлисларнинг севимли иштирокчиларидан бирига айланди, аммо унга кам экран вақти берилди.
Бироқ Netflix’нинг кенгайтирилган видеосида (09:40) сериал эпизодига киритилмаган саҳналар кўп, унда Танос ҳар бир ўйинда ўз жамоасини мақтайди ва ҳатто ҳужумга учраганидан кейин иштирокчилардан бирини ҳимоя қилади. Сериалда бу қисмлар кесиб ташланган, чунки режиссёр фикрига кўра, бундай хатти-ҳаракат унинг образига хос бўлмаган.
Қонли жанг саҳнасининг қисқартирилиши ҳам ажабланарли эмас, чунки ижодкорлар томошабиннинг асосий эътиборини бошқа бир қанча муҳим жиҳатларга қаратишни мақсад қилган. Масалан, мусобақани биринчи бўлиб бошлаб, муваффақиятсизликка учраган жамоа ва уларнинг тақдири атрофдагиларни қўрқитиши; ўйинларни тўлиқ бажарган жамоа ҳамда Сон Ги Хуннинг тақдири диққат марказида бўлиши лозим эди.
Мазкур видеода сериалдаги саҳна орти лавҳалардан ташқари декорацияга боғлиқ маълумотлар, кулгили ҳолатлар, шунингдек, Пак Сонхун (трансгендер ўйинчи)нинг тасодифан аёлга ҳақиқий шапалоқ туширгани каби қизиқарли воқеаларнинг гувоҳи бўлиш мумкин.
“Калмар ўйини 2” сериалининг иккинчи мавсуми ўтган йилнинг охирида Netflix томонидан намойиш этилди ва том маънода кино саноатида катта шов-шувга сабаб бўлди. Сериал қисқа вақт ичида барча рақибларини ортда қолдирди, томошабинлар сони эса ҳануз ортиб бормоқда. Сериалнинг учинчи мавсуми 2025 йил 27 июнда премера қилиниши кутилмоқда.
Изоҳ (0)