Ўзбекистонда аллақачон оммалашиб кетган турк сериаллари нафақат Ўрта Осиё давлатларида, балки бошқа кўплаб хорижий мамлакатларда севиб томоша қилинади. Аммо нима учун турк сериаллари жуда узоқ давом этишига қарамай мухлислар қалбидан жой олишда давом этмоқда?
Масалан, “Муҳташам юз йил”, “Қўрғон сирлари” ёки “Қизил шарбат” каби лойиҳаларнинг ҳар бир эпизоди ўртача бир соат давом этади. Айрим турк сериалларида эса ҳар бир эпизод икки соатга ҳам бориши мумкин. Шунга қарамай уларнинг машҳур бўлишига иккита асосий сабаб бор:
Реклама
Биринчи сабаб бу рекламадир. Туркияда маҳаллий сериаллар телеканалларнинг асосий даромад манбаи ҳисобланади. Эпизод қанча узоқ чўзилса, шунча кўп миқдорда реклама вақти қўйилиши мумкин. Сериалнинг ҳар 15-20 дақиқасида томошабинлар турли рекламаларни томоша қилади, бу эса телеканалга катта даромад келтиради. Шунинг учун продюсерлар эпизодларни иложи борича узоқроқ бўлишига интилади. Бу иккала томон учун ҳам манфаатлидир. Албатта, сериалнинг давомини кутишга мажбур бўлган томошабинлар бундан мустасно.
Рейтинглар ва сюжетнинг ўзгарувчанлиги
Иккинчи сабаб сериал рейтингидир. Турк сериаллари кўпинча “жонли” тарзда суратга олинади, яъни сюжетнинг асосий қисми ёзилганига қарамай, ниҳояси аввалдан маълум бўлмайди. Ижодкорлар томошабинларнинг фикр-мулоҳазаларини ижтимоий тармоқларда фаол кузатиб боради ва уларнинг истакларини инобатга олиб, сериалга турли ўзгартиришлар киритади. Агар томошабинларга маълум бир сюжет ёки образ ёқса, ўша қаҳрамон ҳақида кўпроқ ҳикоялар ёритилади. Аксинча, сериалнинг бирор қисми негатив танқидларга учраса, ўша қисми секин-аста сюжетдан чиқариб ташланади. Мухлисларнинг истаклари ва қизиқишларини ҳисобга олган ҳолда бундай мослашувчанлик режиссёрларга қўл келади. Натижада сериални жуда узоқ муддатга узайтириш имконияти пайдо бўлади.
Бу икки омил турк сериалларини ўзига хос ва кўпчилик учун қизиқ бўлишига замин яратади. Улар ҳам томошабинларни хушнуд этиш, ҳам рекламадан яхши даромад топишга муваффақ бўлади.
Изоҳ (0)