Кемерон Диас “Ниқоб” комедиясида дебют қилганида эндигина 20 ёшга кирганди. Ўшандан бери йигирма йилдан ортиқ вақт давомида у Голливуднинг энг талабгир актрисаларидан бири бўлди. Бироқ карьерасининг юқори чўққисида малла соч аёл тўсатдан экранлардан ғойиб бўлди. Катта роллар, гулдурос қарсаклар ва кино мукофотлари ўрнига у тинч ҳаётни афзал кўрди ва у меҳрибон уйбекаси ва ғамхўр она ролини танлади.
Ёрқин дебют
Кемерон Диас 1972 йилда туғилган. Унинг онаси импорт ва экспорт бўйича агент, отаси эса нефть қазиб олиш станциясида ишчи бўлган. Актрисанинг томирларида куба, инглиз ва немис қони оқади. Кемерон ота-онасини ҳурмат билан эслайди ва улар жуда меҳрибон бўлганини таъкидлайди. Кемерон катта опаси Шимен билан бирга катта бўлган.
Бўлажак актриса илон ва сичқонлар боқиб, зоолог бўлиш ҳақида жиддий ўйларди. У оддий мактабда ўқиган. Айтганча, унинг синфдоши бўлажак рэпер Snoop Dog бўлган. Болалигида Кемерон тенгдошларидан баланд бўйи ва ёқимли табассуми билан ажралиб турарди.
16 ёшида Диас Elite Моdel Management агентлиги билан шартнома имзолаб, ўзини моделликда синаб кўради. Унинг эслашича, ўша йилларда у ташқи кўринишига жуда эҳтиёткорлик билан муносабатда бўлган. У доим ўзини тенгдошлари билан таққосларди.
Кемерон илк дебюти 21 ёшида “Ниқоб” фильмида қилади. Унга моделлик агентлиги ходимларидан бири кастингга келишни маслаҳат беради. Бу ролга тасдиқланган Диас дарҳол актёрлик маҳоратидан сабоқ ола бошлайди, чунки унинг бу соҳада ҳеч қандай тажрибаси йўқ эди.
Ушбу комедияда Кемерон Жим Керри билан ажойиб тандем бўлиб, фильм 1994 йилнинг энг кўп даромад келтирган ўнта фильми қаторига киради. Интервьюларидан бирида актриса “Ниқоб”дан кейин уни нафис ва чиройли деб аташганлигини айтади, лекин у ўзини бундай деб ҳисобламасди.
Машҳурлик чўққисида
Бундай бош айлантирувчи муваффақиятдан сўнг Кемерон режиссёрлардан кўплаб таклифлар ола бошлайди. Шундай қилиб, 1996 йилда актриса иштирокида 3 та фильм чиқади. 1997 йилда у “Дўстимнинг тўйи” фильмида Жулия Робертснинг рақиби ролини ўйнайди, мазкур фильм барча даврларнинг энг яхши романтик комедияларидан бири сифатида тан олинади.
Бир йил ўтгач, Диас “Ҳамма Мери деб ақлдан озган” фильмида бош ролни ижро этиб, “Олтин глобус” мукофотига номзод бўлади. Суратга олиш пайтида у актёр Метт Диллон билан танишади ва у билан у қисқа вақт давомида учрашиб юради.
Кемерон кейинчалик жиддийроқ роллари билан карьерасида кескин бурилиш қилади. Шундай қилиб, 1999 йилда у “Жон Малкович бўлиш” фильмида ишсиз қўғирчоқбознинг бахтсиз хотини ролини ўйнайди. Танқидчилардан бири шундай деб таъкидлайди: “Кинодаги энг гўзал аёллардан бири бўлган бу актриса бу фильмда жуда ёқимсиз кўринадики, ҳатто уни танимадик”.
Янги минг йилликнинг бошида Диас 2000 йилнинг энг юқори даромад келтирган фильмларидан бири бўлган “Чарли фаришталари” фильмида иштирок этади. Бир йил ўтгач, у “Кўринмас цирк” ва “Ванилли осмон” фильмларида рол ўйнайди. Охирги фильмдаги роли учун у нуфузли мукофотларга номзод бўлган ва кўплаб танқидчиларнинг ижобий фикрларини олган.
Шундан сўнг “Шрек” мультфильмининг тўрт қисмида Фионага овоз бериш ва Мартин Скорсезе режиссёрлигидаги “Нью Йорк тўдалари” драмасидаги ёрқин рол билан давом этади. Айтганча, Диас айнан “Нью Йорк тўдалари”даги ишини ўз карьерасининг энг юқори чўққиси деб ҳисоблаганини эътироф этган.
2010 йилда Forbes журналида Кемерон Диас “Энг бой ва машҳур 100 аёл” рўйхатида 60-ўринни эгаллайди. Кейинчалик актриса яна бир қатор фильмларда иштирок этади, уларнинг кўпчилиги унчалик омадли чиқмайди. 2013 йилда у Хавер Бардем, Пенелопа Круз ва Бред Питт билан бирга “Маслаҳатчи”да рол ўйнайди. Фильм яхши қабул қилинмаган бўлса-да, Кемероннинг роли сўнгги йилларда кинодаги энг яхшиларидан бири сифатида тан олинади.
2014 йилда Диаснинг сўнгги фильми — “Энни” мусиқий фильми экранларга чиқади. Унда у болалар уйининг шафқатсиз ходимаси ролини ижро этади. Танқидчиларнинг фикрича, актриса “ҳаддан ташқари ҳиссиётга берилган”, “жуда кескин ва ёқимсиз” эди.
Шундан сўнг Кемерон актёрлик фаолиятида танаффус қилишга қарор қилади. 2017 йилда у уй ва суратга олиш майдончаси ўртасида ўтказган 20 йиллик карьераси уни чарчатганини айтиб, дам олиши кераклигини эълон қилади.
Голливуддан узоқда
2013 йил охирида Диас The New York Times бесцеллерлар рўйхатида 1-ўринни эгаллаган “Тана ҳақида китоб” асарини нашр этади. Унда актриса ҳар доим ҳам соғлиғига ғамхўрлик қилмаганини тан олиб, энди бунга кўпроқ эътибор қаратганини таъкидлайди. 2016 йилда Кемерон “Узоқ умр кўриш ҳақида китоб”ини чоп этади. Ўшандан бери у соғлиқни сақлаш ва биотехнологиялар соҳасидаги стартапларга сармоя киритмоқда.
2014 йилда Кемероннинг яқин дугонаси Никол Ричи уни мусиқачи Бенжи Мадден билан таништириб қўяди. 10 ойдан кейин улар турмуш қуришади. 2019 йилда суррогат оналик орқали эр-хотиннинг қизи дунёга келади. Дарвоқе, Диас Голливудда шундай йўл билан она бўлган ягона аёл эмас.
Яқинда Гвинет Пелтроуга берган интервьюсида Диас шахсий ҳаётига умуман вақти қолмаслигини тушунганидан кейин кинони тарк этганини тан олган. Фаолиятини тугатгандан сўнг, у ўзига ғамхўрлик қила бошлагани учун руҳий хотиржамликка эришган.
“Доим омма олдида ва ҳамманинг эътиборида бўлиш жуда қийин. Ҳар доим машҳурларга қаратилган жуда катта энергия бор ва бу сизни босим остида ҳис қилишингизга сабаб бўлади”.
Камерон барча актёрларни бир оз гўдак деб ҳисоблайди, чунки суратга олиш майдончасида уларга мустақил равишда ҳеч нарса қилишга, ҳатто сумкасини кўтариб юришга ҳам рухсат берилмайди. Шу туфайли уларнинг ҳаёти кўп жиҳатдан чекланган бўлади.
“Сиз танимайдиган одамлар доим сиз учун нимадир қилишга ҳаракат қилишади. Шу сабабли ўзимни ҳар доим ноқулай ҳис қилардим. Мен ўзимга ғамхўрлик қила олишимни, катта бўлишимни ва ҳаёт қийинчиликларини енгишимни, шунингдек, ўзим учун масъулиятни ўз зиммамга олишим ва бошқаларнинг фикрига кўра эмас, балки ўзим хоҳлагандек яшашим мумкинлигини ўзимга исбот қилишим керак эди”.
Кемерон ботокс ва пластик жарроҳликка қарши бўлиб, бу соҳадаги шифокорлар хизматидан фақат тиббий кўрсатмалар бўйича фойдаланган. Актриса тўрт марта бурнини синдирган: уч марта сёрфинг билан шуғулланаётганда, бир марта эса шиша эшикка уриб олган. Шу сабабли пластик жарроҳга мурожаат қилишга мажбур бўлган. Бундан ташқари, Диас тахминан 20 йилдан буён дезодорант ва терлашга қарши воситалардан фойдаланмайди.
Карьерага қўйилган нуқта
Актриса касбини бутунлай тарк этиши ҳақида ҳеч қачон гапирмаган. Диас экранларда кўринмай қолганини карьерасидаги танаффус деб атайди. 2022 йилда эса юлдуз катта кинога қайтишга тайёрлиги маълум бўлди.
У кўп йиллик дўсти ва ҳамкасби Жейми Фокс фильмида рол ўйнайди. Актрисанинг айтишича, у деярли 10 йилдан сўнг суратга олиш жараёнига қайтишидан жуда ҳаяжонланмоқда. Эҳтимол, бу сафар Кемерон иш ва оила ўртасидаги мукаммал мувозанатни топишга эришар.
Изоҳ (0)