35 ёшли актриса Лили Коллинз ва унинг 41 ёшли турмуш ўртоғи, режиссёр Чарли Макдауэлл илк марта ота-она бўлишди. Коллинз бу янгиликни ўзининг Instagram саҳифасида эълон қилди ва фарзандининг сурати билан бўлишди.
Эр-хотин суррогат она ёрдами билан қизлик бўлишди. Чақалоққа Туве Жейн деб исм қўйилди.
“Ҳаётимизнинг марказига хуш келибсиз, Туве Жейн Макдауэлл. Бизнинг ажойиб суррогат онамизга ва бу йўлда бизга ёрдам берган барчага чексиз миннатдорчилигимизни таърифлашга сўз ожиз”, деб изоҳ қолдирди актриса.
“Биз сени чексиз яхши кўрамиз”, деб ёзди Коллинз қизига қарата.
Маълумот учун, Лили Коллинз 1989 йил 18 мартда Англиянинг Гилдфорд шаҳрида туғилган. У актриса, модел ва ёзувчи ҳамдир. Лилининг отаси машҳур британиялик мусиқачи Фил Коллинз, онаси эса Жилл Тавелман. Бўлажак актриса болалигида АҚШга кўчиб ўтган ва Лос Анжелесда вояга етган.
Унинг кино карьераси 2009 йилда бошланган бўлиб, тез орада машҳур фильмларда рол ўйнай бошлаган, энг катта машҳурлик унга Netflixнинг “Эмили Парижда” лойиҳаси олиб келди. Лили Коллинз актрисаликдан ташқари ёзувчилик билан ҳам шуғулланади. У Unfiltered: No Shame, No Regrets, Just Me номли автобиографик китобини ёзган. 2021 йил 4 сентябрда режиссёр Чарли Макдауэлл билан турмуш қурган.
Изоҳ (0)