АҚШ президенти Дональд Трамп мамлакатнинг 35-президенти Жон Кеннеди, унинг укаси, собиқ бош прокурор Роберт Кеннеди ва руҳоний Мартин Лютер Кингнинг ўлдирилиши билан боғлиқ ҳужжатларни очиқлаш тўғрисидаги фармонни имзолади.
Мен президент Жон Кеннедининг ўлдирилиши билан боғлиқ ёзувлардаги маълумотларни таҳрир қилиш ва яшириш давом этаётгани жамоатчилик манфаатларига зид эканига ва бу ёзувларни эълон қилиш вақти аллақачон етганига ишонч ҳосил қилдим, дейилади ҳужжатда.
Трампга 15 кун ичида Жон Кеннедининг ўлдирилиши бўйича терговга оид ҳужжатларни тўлиқ эълон қилиш режаси берилади. Бундан ташқари, 45 кун ичида Роберт Кеннеди ва Мартин Лютер Кингнинг ўлдирилиши бўйича тергов материаллари ўрганиб чиқилиб, уларни эълон қилиш режаси ҳам берилиши керак.
Шов-шувли сиёсий қотилликлар
♦ Жон Кеннеди АҚШ президенти этиб сайланганидан икки йил ўтгач, 1963 йил 22 ноябрда Далласга расмий ташрифи чоғида отиб ўлдирилди.
Қотилликда гумонланиб, собиқ денгиз пиёдаси Ли Харви Освалд қамоққа олинди. У уч кундан сўнг тунги клуб эгаси Жек Руби томонидан отиб ўлдирилган. Руби кейинчалик қамоқхонада вафот этган
♦ Жоннинг укаси Роберт Кеннеди АҚШ Бош прокурори (1961-1964) ва Нью Йорк штати сенаторлик (1965-1968) лавозимларида ишлаган. У демократлардан президентликка номзодини қўйган ва 1968 йил 5 июнда Лос-Анжелесда сайловолди кампанияси давомидаги митингда отиб ўлдирилган.
Жиноят содир этилган жойда фаластинлик Серхан Серхан қўлга олинган. 1969 йилда у ўлим жазосига ҳукм қилинган, кейинчалик ҳукм умрбод қамоқ жазосига ўзгартирилган.
♦ 1968 йил 4 апрелда Теннесси штатининг Мемфис шаҳрида қора танлилар ҳуқуқлари ҳаракатининг етакчиси, руҳоний Мартин Лютер Кинг ўлдирилди. Унинг: “Мен орзу қиламанки, тўрт фарзандим бир кун келиб тери рангига эмас, балки шахсий фазилатларига қараб баҳоланадиган мамлакатда яшайди”, деган машҳур ибораси оммалашганди.
Мартин Лютер Кингни ўлдиргани учун илгари бир неча бор судланган Жеймс Эрл Рей 99 йил муддатга қамоқ жазосига ҳукм қилинган. У 1998 йилда қамоқхонада вафот этган.
Изоҳ (0)