Бугунги рўйхатдаги хонандалар ва қўшиқ муаллифлари ҳаётининг қолган қисмини ҳеч қандай молиявий ташвишсиз ўтказиш имконини берадиган етарлича даромадга эга. Бундай натижага биргина мукаммал тарзда яратилган қўшиқ сабаб бўлди. Юлдузлар ҳозирда нафақага чиқиш ва муваффақиятдан завқланиш ўрнига севимли соҳаси — санъат йўналишида ўз фаолиятини давом эттириб келмоқда. Қўшиқнинг янгиланган версияси аслидан машҳурроқ бўлган тақдирда ҳам, муаллиф даромаднинг бир қисмига эга бўлади.
“Every Breath You Take” — Стинг
Қўшиқ 1982 йилда Тhе Police мусиқий гуруҳи томонидан ижро этилган. Қўшиқ матни мазкур гуруҳнинг собиқ аъзоси хонанда Стингга тегишли. Релиздан сўнг ушбу трек кетма-кет саккиз ҳафта давомида Billboard Top 100 чартида биринчи ўринни эгаллаган.
Puff Daddy номи билан танилган хонанда Шон Комбс ўзининг марҳум дўсти — Тhе Notorious B.I.G. хотирасига бағишлаб “I’ll be Missing You” трекини ёзган. Қўшиқнинг ушбу версияси 7 миллион АҚШ доллари миқдорида даромад келтирди.
“Yesterday” — Жон Леннон ва Пол Маккартни
Пол Маккартни Тhе Beatles гуруҳининг 1965 йилда яратилган машҳур “Yesterday” қўшиғи матнини ёзди. У хонанда Жон Леннон билан муаллифлик ҳуқуқини бўлишди ва уларнинг иккиси трекдан катта даромад олди. Қўшиқ АҚШ чартларида узоқ вақт давомида биринчи ўринни эгаллади. “Yesterday” муаллифларга ҳар йилда 30 миллион доллар фойда келтирди.
“Happy birthday to you” — The Hill Sisters
Туғилган кун билан табриклаш ҳақидаги қўшиқ 1893 йилда Кентукки штатининг Луисвилл шаҳридан опа-сингил Ҳилл томонидан ёзилган. Патти Ҳилл мактабда ўқитувчи, унинг синглиси Милдред эса бастакор эди. Улар қўшиқни мактабдаги тадбир учун яратишди. Орадан бир асрдан ортиқ вақт ўца-да, мазкур қўшиқ бутун дунё бўйлаб байрамларнинг ажралмас қисмига айланган.
Асар муаллифлик ҳуқуқи бир неча марта ўзгарган ва ҳозирда Warner Chappel Music компаниясига тегишли. “Туғилган кунингиз билан” қўшиғи кунига тахминан 5000 АҚШ доллари миқдорида гонорар келтиради. Унинг энг машҳур версияси Мерилин Монро томонидан 1962 йилда президент Жон Кеннеди учун ижро этилган.
“Shape of You” — Эд Ширан, Стив Мак ва Жонни Макдейд
Хонанда Эд Шираннинг 2017 йилда намойиш этилган “Shape of You” қўшиғи барча даврларнинг энг юқори даромадга чиққан мусиқаси ҳисобланади. Асар британиялик мусиқачилар Стив Мак ва Жонни Макдейд томонидан ёзилган бўлиб, 42 миллион нусхада сотилган. Эд Ширан энг яхши поп ижрочи сифатида “Грэмми” мукофоти билан тақдирланган.
“Despacito” — Луис Родригес, Рамон Аяла ва Эрика Эндер
“Despacito” 2017 йилда улкан муваффақиятга эришиб, барча даврларда энг кўп сотилган учинчи қўшиққа айланди. Луис Родригес, Рамон Аяла ва Эрика Эндер томонидан ёзилган бу асар дастлаб Луис Фонси ва Дедди Янки томонидан ижро этилган ва Лотин Америкасида ҳитга айланган.
Жастин Бибер кейинчалик Колумбиядаги тунги клубда трекни эшитиб қолиб унга ремикс ёзишга қарор қилди. Ушбу версия 2017 йилда 24 миллион нусхада сотилган йилнинг энг машҳур қўшиқларидан бирига айланди.
“Оh, Pretty Woman” — Рой Орбисон ва Билл Дис
Рой Орбисон ва Билл Дис биргаликда 1964 йилда оммага деярли танилмаган “Оh, Pretty Woman” қўшиғини ёзди. Трек 1990 йилда “Гўзал аёл” фильмида жаранглагач, қўшиқ нуфузи ошиб кетди.
Фильмнинг муваффақияти туфайли қўшиқ ҳитга айланди ва 19,75 миллион АҚШ доллар даромадга чиқди. Ёзувчи Билл Дис 2012 йилда таъкидлаганидек, у ҳали ҳам йилига 100 000 дан 200 000 АҚШ долларигача фойда олади.
“I Will Always Love You” — Долли Партон
Мазкур қўшиқнинг асл муаллифининг исми кўпчиликка номаълум. Долли Партон буни 1973 йилда ёзган ва қўшиқ Billboard Hot Country Songs чартида икки марта биринчи ўринни эгаллаган.
Уитни Ҳюстон 1992 йилда “Тансоқчи” фильми учун қўшиқнинг янги версиясини ижро этди. Кавер 24 миллион нусхада сотилди ва Долли Партонга катта тижорий муваффақият олиб келди.
Изоҳ (0)