Латвия ташқи ишлар вазири Эдгар Ринкевич президент этиб сайланди

Латвия Сейми мамлакатнинг янги президентини сайлади. Ушбу лавозимни мамлакат ташқи ишлар вазири Эдгар Ринкевич эгаллади.

Ринкевич номзоди бош вазирнинг “Янги бирлик” партияси томонидан илгари сурилган. Аммо ҳукмрон коалициядаги барча партиялар ҳам ТИВ раҳбарини қўллаб-қувватламаган, шу боис уни сайлаш учун уч турда овоз беришга тўғри келди. Охирги турда Ринкевич 52 та овоз олди.

Президент сифатида Ринкевиcс 2019 йилдан буён ушбу лавозимда ишлаб келаётган Эгилс Левитснинг ўрнини эгаллайди. Левитс бу сафарги сайловда қатнашмади.

Латвия парламентли республика. Президент расмий давлат раҳбари, лекин у бош вазирга қараганда анча кам ваколатларга эга. Ринкевич 1991 йилда мамлакат мустақиллиги тикланганидан бери Латвиянинг еттинчи президенти бўлди.

Эслатиб ўтамиз, 28 май куни Туркияда президентлик сайловларининг иккинчи босқичида амалдаги давлат раҳбари Ражаб Тоййиб Эрдўғон янги муддатга сайланди.

АҚШда эса Жон Кеннедининг жияни, адвокат Роберт Кеннеди Америка президентлиги учун сайловларда Демократик партиядан номзод сифатида иштирок этиш мақсадида ариза бергани хабар қилинганди.