AQSH prezidenti Donald Tramp mamlakatning 35-prezidenti Jon Kennedi, uning ukasi, sobiq bosh prokuror Robert Kennedi va ruhoniy Martin Lyuter Kingning o‘ldirilishi bilan bog‘liq hujjatlarni ochiqlash to‘g‘risidagi farmonni imzoladi.
Men prezident Jon Kennedining o‘ldirilishi bilan bog‘liq yozuvlardagi ma’lumotlarni tahrir qilish va yashirish davom etayotgani jamoatchilik manfaatlariga zid ekaniga va bu yozuvlarni e’lon qilish vaqti allaqachon yetganiga ishonch hosil qildim, deyiladi hujjatda.
Trampga 15 kun ichida Jon Kennedining o‘ldirilishi bo‘yicha tergovga oid hujjatlarni to‘liq e’lon qilish rejasi beriladi. Bundan tashqari, 45 kun ichida Robert Kennedi va Martin Lyuter Kingning o‘ldirilishi bo‘yicha tergov materiallari o‘rganib chiqilib, ularni e’lon qilish rejasi ham berilishi kerak.
Shov-shuvli siyosiy qotilliklar
♦ Jon Kennedi AQSH prezidenti etib saylanganidan ikki yil o‘tgach, 1963-yil 22-noyabrda Dallasga rasmiy tashrifi chog‘ida otib o‘ldirildi.
Qotillikda gumonlanib, sobiq dengiz piyodasi Li Xarvi Osvald qamoqqa olindi. U uch kundan so‘ng tungi klub egasi Jek Rubi tomonidan otib o‘ldirilgan. Rubi keyinchalik qamoqxonada vafot etgan
♦ Jonning ukasi Robert Kennedi AQSH Bosh prokurori (1961-1964) va Nyu York shtati senatorlik (1965-1968) lavozimlarida ishlagan. U demokratlardan prezidentlikka nomzodini qo‘ygan va 1968-yil 5-iyunda Los-Anjelesda saylovoldi kampaniyasi davomidagi mitingda otib o‘ldirilgan.
Jinoyat sodir etilgan joyda falastinlik Serxan Serxan qo‘lga olingan. 1969-yilda u o‘lim jazosiga hukm qilingan, keyinchalik hukm umrbod qamoq jazosiga o‘zgartirilgan.
♦ 1968-yil 4-aprelda Tennessi shtatining Memfis shahrida qora tanlilar huquqlari harakatining yetakchisi, ruhoniy Martin Lyuter King o‘ldirildi. Uning: “Men orzu qilamanki, to‘rt farzandim bir kun kelib teri rangiga emas, balki shaxsiy fazilatlariga qarab baholanadigan mamlakatda yashaydi”, degan mashhur iborasi ommalashgandi.
Martin Lyuter Kingni o‘ldirgani uchun ilgari bir necha bor sudlangan Jeyms Erl Rey 99 yil muddatga qamoq jazosiga hukm qilingan. U 1998-yilda qamoqxonada vafot etgan.
Izoh (0)