АҚШ собиқ раҳбари Дональд Трамп президент лавозимига қайта сайланса, 1963 йилда АҚШнинг 35-президенти Жон Кеннедининг ўлдирилиши, 2001 йил 11 сентябрдаги терактлар билан боғлиқ материалларни махфийликдан чиқаришга ваъда берди. Бу ҳақда унинг Fox News’га берган интервьюсига таяниб, “ТАСС” хабар берди.
Трампдан Америка жамоатчилигининг Марказий разведка ва Федерал қидирув бюроси каби органларга ишончини тиклашда унинг ҳужжатларни махфийликдан чиқариш эҳтимоли қандайлиги сўралди. Сиёсатчи президентлик даврида Кеннедининг ўлдирилиши бўйича “кўплаб материаллар”ни ошкор қилгани ва буни давом эттиришини таъкидлади.
Шунингдек, у қайта сайланган тақдирда, АҚШ Бош прокурори лавозимига “иккита номзоди” борлигини айтди. Трамп президентлик даврида Бош прокурор лавозимига номзодлар бўйича бир нечта нотўғри қарорлар қабул қилганини тан олди.
АҚШда президентлик сайловлари 5 ноябрь куни бўлиб ўтади. Трамп Республикачилар партиясидан давлат раҳбариликка номзод сифатида кўрсатилиши учун зарур бўлган овоз тўплаган. Иккинчи муддатга даъвогарлик қилаётган Жо Байденни Демократик партиядан етарли миқдордаги делегатлар қўллаб-қувватлаган.
Изоҳ (0)