Англия Премьер Лигаси 2-тури доирасидаги “Манчестер Сити” ҳамда “Тоттенҳэм” жамоалари ўртасидаги баҳс 23 август, шанба куни Манчестер шаҳридаги “Etihad” стадионида бўлиб ўтди. Учрашувда меҳмонлар 2:0 ҳисобида ғалаба қозонди.
Ҳисоб 35-дақиқада очилди. Ришарлисон чап қанотдан бошлаб берган ҳужумни Бреннан Жонсон гол билан якунлади ва “Тоттенҳэм”ни олдинга олиб чиқди. Биринчи бўлим якунида “Манчестер Сити” дарвозабони Жеймс Траффорд ва ҳимоячилар ўртасидаги тушунмовчиликдан сўнг “шпорлар” иккинчи бор рақиб дарвозасини ишғол қилди. Бу сафар Жоау Палиня ўз номига гол ёздириб қўйди.
Ўйиннинг қолган дақиқалари ҳам курашларга бой бўлди, бироқ ҳисоб ўзгармади. Ушбу ғалабадан сўнг “Тоттенҳэм” очколарини 6 тага етказиб, онлайн турнир жадвалида 1-ўринга чиқиб олди. 3 очкога эга “Манчестер Сити” эса ҳозирча 5-ўринда бормоқда.
Маълумот учун, Ўзбекистон миллий терма жамоаси ҳимоячиси Абдуқодир Ҳусанов ушбу баҳсда майдонга тушмади.
Англия Премьер Лигаси
2-тур
23 август, шанба
“Манчестер Сити” — “Тоттенҳэм” 0:2
Голлар: 0:1 — Жонсон (35), 0:2 — Палиня (45+2)
Изоҳ (0)