Ҳатто энг бадавлат ва машҳур кишилар ҳам ўлим билан юзма-юз келади. Бир пайтлар Эпикюр шундай деган эди: “Ўлимдан қўрқма: токи сен тирик экансан, у йўқ, келганда эса сен бу ерда бўлмайсан”. Абадий тинчликка кетишдан аввал шундай машҳур инсонлар ўлимидан аввал қандай сўз айтганини ўқиш барчага қизиқ. Қуйида бутун дунёга таниқли шахсларнинг сўнгги сўзларини келтириб ўтамиз.
Фрэнк Синатра
Фрэнк Синатра актёр, қўшиқчи ва шоумен бўлган. У 1998 йилнинг 4 май куни 82 ёшида Лос Анжелесда миокард инфаркти туфайли вафот этган. Тҳе Mirror нашрининг ёзишича, Синатра сўнгги дақиқаларда хомушлик билан рафиқасига юзланиб, “Мен ютқазяпман”, — деган. Ўша вақт хонандани ваҳима босмаган, аммо нафас олиши қийинлашгани туфайли базўр сўзларини айтиб қолган.
Стив Жобс
Apple компанияси асосчиси вафотидан кейин бир неча йил ўтгач, Интернетда марҳумнинг ўлими олдидан айтган гаплари тарқала бошлади. Унга кўра, Жобс бойлик ва муваффақиятнинг бефойдалиги ҳақида баланд овозда нутқ сўзлаган эди. Аслида эса миш-мишлардан фарқли ўлароқ, Стивнинг сўнгги сўзлари ҳайратга тўла ва қисқа бўлган: “Вой! Буни қаранг! Вой!”.
Малика Диана
Маълумотларга кўра, Париждаги автоҳалокатдан кейин Диана атрофга қараб, машинада яна икки йўловчининг жасадини кўрган ва саросимага тушиб: “Эй худойим, нима бўлди?” дея жон таслим қилган. Унинг ўлимига ўпка венасининг ёрилиши сабаб бўлган.
Ҳит Леджер
Актёр 2008 йил январь ойида “Доктор Парнас хаёлоти” фильмини суратга олиш даврида вафот этди. Ўлимидан аввалги кечада Ҳит синглиси билан телефонда гаплашди. У ухлашга ёрдам берадиган дориларни бошқа дорилар билан бирга қабул қилмаслиги кераклигини айтганида, актёр: “Кети, ҳаммаси яхши бўлади”, — дея жавоб берган.
Коко Шанель
Мода оламини ўзгартириб юборган афсонавий дизайнер Коко Шанель 1971 йил 10 январда юрак хуружидан вафот этган. Сўнгги дақиқаларда у ўзининг хизматкори Селинга қарата: “Кўряпсизми, инсонлар шундай ўлади”, — деган ва боқий дунёга кетган.
Мерилин Монро
1962 йил 5 августда таниқли актриса ва модел Мерилин Монро Лос Анжелесдаги уйининг ётоқхонасида ўлик ҳолда топилди. У ҳодисадан аввал дўсти Питер Лоуфордга қўнғироқ қилган ва “Менинг ўрнимга Пет (Лоуфорднинг рафиқаси) билан хайрлаш, Жекка (Кеннеди) ҳам хайрлашувимни етказ ва ўзинг билан ҳам видолашиб ол, чунки сен яхши инсонсан”, — дея суҳбатни якунлаган.
Майкл Жексон
Поп қироли концерт дастури учун машқларни бажариб бўлгач, 2009 йил 25 июнь куни ярим тундан кейин уйига қайтди. Жексон тунда уйқусизликдан азият чекар эди, шунинг учун у шахсий шифокори Конрад Мюррейдан бир қатор кучли ухлатувчи дорилар беришини сўрар эди. Дорилар кор қилмагач, хонанда шифокорга “Илтимос, ухлаб қолишим учун менга сут беринг”, — деб илтимос қила бошлади. Қўшиқчи энг кучли оғриқ қолдирувчи пропофолни “сут” деб атарди. Майкл ўлимга олиб келадиган кучли дори-дармонларни қабул қилиб, қайта кўзларини очмади.
Боб Марли
Bob Marley and Тhе Wаilers гуруҳи асосчиси, таниқли мусиқачи Боб Марли Ямайкада туғилган. 11 нафар фарзанднинг отаси 1981 йил 11 майда саратон касаллиги туфайли касалхонада дунёдан кўз юмган. Мусиқачининг ўғли Зиггига айтган сўнгги сўзлари “Ҳаётни пулга сотиб ололмайсан” бўлган.
Изоҳ (0)