АҚШ президентлигига Республикачилар партиясидан ўз номзодини қўйиш ниятида бўлган Нью-Жерси штатининг собиқ губернатори Крис Кристи сайловдан чиқишга қарор қилди, деб хабар бермоқда Bloomberg.
“Бугун менга (Республикачилардан) номинацияда ғалаба қозониш имконияти йўқлиги аён бўлди, шунинг учун кечқурун сайловолди компаниямни тўхтатаман”, — деди Кристи 10 январь куни Нью-Хемпшир шаҳар ҳокимиятида.
Bloomberg таъкидлашича, эндиликда АҚШнинг Бирлашган Миллатлар Ташкилотидаги собиқ элчиси Никки Ҳейли ҳамда Флорида губернатори Рон Десантис Республикачилар партиясидан президентликка номзодлик учун курашда Дональд Трампнинг асосий рақобатчиларига айланди.
The New York Times АҚШ президентлигига ҳозирги босқичда 12 нафар номзодни санаб ўтди: уч нафари демократлардан, олти нафари республикачилардан, яна уч нафари мустақил ёки бошқа партиялар аъзоси. Булар:
- амалдаги президент Жо Байден;
- селф-ҳелп жанридаги ёзувчи, телебошловчи Опра Уинфрининг собиқ устози Марианна Уильямсон;
- Вакиллар палатаси аъзоси Дин Филлипс;
- Дональд Трамп;
- Никки Ҳейли;
- Рон Десантис;
- келиб чиқиши ҳиндистонлик тадбиркор Вивек Рамасвами;
- Арканзаснинг собиқ губернатори Аса Ҳатчинсон;
- техаслик бизнесмен ва черков пастори Райан Бинкли;
- АҚШ собиқ президенти Жон Кеннедининг жияни кичик Роберт Кеннеди;
- фалсафа профессори Корнел Уэст;
- физик Жилл Штайн.
Яна саккиз киши, жумладан Кристи пойгадан чиқиб кетди.
Дональд Трамп сайловларда иштирок этишда муаммоларга дуч келмоқда. Мэн ва Колорадо штатлари 2021 йил январь ойида Капитолийга бостириб кириш билан боғлиқ айбловлар туфайли унга Республикачилар праймеризларида қатнашишни тақиқлади. Сиёсатчи бу тақиқларга қарши чиқмоқчи. Бундан ташқари, Трампнинг сайловлардаги иштирокига унга нисбатан суд жараёнлари тўсқинлик қилиши мумкин: у тўртта жиноий иш бўйича айбланувчига айланган, жами 91 та жиноий иш қўзғатилган.
Изоҳ (0)