АҚШ президентлигига номзод кичик Роберт Кеннеди агар сайланса, Украинадаги урушга 100 кун ичида барҳам беришини айтди, бу ҳақда у ўзининг Х (собиқ Twitter) аккаунтида ёзди.
У уруш “ҳамма кутганидан ҳам яхшироқ шартлар билан” якунланишига ишонтирди.
Кичик Роберт Кеннеди 69 ёшда. У 1965—1968 йилларда Нью-Йорк штатидан сенатор ва АҚШнинг собиқ Бош прокурори (1961—1964) бўлган Роберт Кеннедининг ўғли. Катта Роберт Кеннеди эса 1963 йилда Далласда отиб ўлдирилган АҚШ собиқ президенти Жон Кеннедининг укаси. Акаси каби Роберт Кеннеди ҳам сайловолди кампанияси пайтида отиб ўлдирилган.
Кичик Роберт Кеннеди ҳуқуқшунос ва атроф-муҳит фаоли. У шунингдек, коронавирусга қарши вакцинация ҳақидаги фикрлари билан ҳам танилган. Кеннеди эмлашга қарши чиққан ва АҚШ расмийларининг пандемияга қарши курашдаги ҳаракатларини бир неча бор танқид қилган, деб ёзади CNN.
У 6 апрель куни Демократик партиядан номзод сифатида президентлик сайловларида иштирок этиш учун ариза берди.
Сиёсатчи Украинадаги ҳарбий амалиётлар ва Россия билан муносабатлари ҳақида аввал ҳам бир неча бор гапирган. Хусусан, апрель ойида у Москва ва Киев ўртасидаги урушни Қўшма Штатлар учун катта муаммо деб атаганди, чунки бу Россия ва Хитой ўртасидаги яқинлашувни тезлаштиради, бу эса Вашингтон учун энг ёмон натижадир. Июль ойининг охирида кичик Кеннеди Россия билан “экзистенсиал жанг”дан огоҳлантириб, Москвада йирик ядровий қурол захираси борлигини эслатди.
Изоҳ (0)