Қўшма Штатлар разведка хизмати вакиллари АҚШнинг сайланган президенти Дональд Трамп учун брифинг ўтказишни бошлади. Бу ҳақда The Washington Post нашри хабар берди.
АҚШ расмийлари орасидаги манбаларга кўра, Миллий разведка директори идораси Трампга сайловдан кўп ўтмай махфий маълумотларни тақдим қила бошлаган. Аппарат вакиллари “1952 йилдан бери мавжуд бўлган анъанага кўра, сайланган президентга разведка масалалари бўйича брифинглар беришларини” тасдиқлаган.
Сайлов кампанияси чоғида Трамп журналистларга махфий разведка маълумотларини олишни истамаслигини, чунки уни ошкор қилганликда ноҳақ айблашларидан қўрқишини айтган.
Axios нашри Трамп ҳукуматни шакллантириш тезлиги бўйича замонавий Америка тарихида рекорд ўрнатгани ҳақида хабар берган эди. Хусусан, у сайловдан сўнг 12 кун ичида вазирлик лавозимларига 12 та тайинловни амалга оширган.
Ҳукуматни шакллантириш амалдаги президенти Жо Байдендан беш баравар ва Трампнинг биринчи кабинетини шакллантиришдагидан тўрт баробар тезроқ амалга ошган.
“Бу тарихдаги ҳокимиятни энг самарали топшириш ёки барча меъёрларни бузган ҳолда текширувсиз, тадқиқотсиз ва Сенат билан маслаҳатлашувларсиз амалга оширилган тайинлов жараёни”, деди ҳокимият алмашинуви масалаларига ихтисослашган Америка университети Бизнес мактаби декани Девид Марчик.
Axios нашрининг таъкидлашича, аввалги администрациялар номзодларни текширишнинг белгиланган тартибларига амал қилган бўлса, Трампнинг ёндашуви бу меъёрларни бузмоқда. Дональд Трамп администрациясидаги лавозимлар учун ҳозирда маълум бўлган номзодлар:
- Вице-президент лавозимини Оҳайо штатидан сенатор Жей Ди Венс эгаллайди;
- Давлат котиби Флорида штатидан сенатор Марко Рубио бўлади;
- Миллий хавфсизлик бўйича маслаҳатчи этиб Вакиллар палатаси аъзоси Майк Уолтз тайинланади;
- Пентагон раҳбари сифатида АҚШ Миллий гвардияси фахрийси ва телебошловчи Пит Ҳагсет фаолият юритади;
- Марказий разведка бошқармаси бошлиғи лавозимига Миллий разведканинг собиқ директори Жон Ретклифф тайинланади;
- Миллий разведка директори этиб Демократик партиянинг собиқ аъзоси Тулси Габбард тайинланади;
- Бош прокурор ва адлия вазири Вакиллар палатаси аъзоси Метт Гец бўлади;
- Кичик Роберт Кеннеди АҚШ соғлиқни сақлаш вазири лавозимини эгаллайди;
- “Чегара қироли” лавозимига иммиграция-божхона хизматининг собиқ раҳбари Том Ҳоман ва бошқалар тайинланади;
- энергетика вазири эса Liberty Energy нефть хизматлари компанияси асосчиси ва бош директори Крис Райт бўлиши кутилмоқда.
Америкалик миллиардер Илон Маск ва тадбиркор Вивек Рамасвами давлат самарадорлигини ошириш бўйича янги департаментга раҳбарлик қилади. Департамент (DОGЕ) деб номланади. У Dogecoin (DОGЕ) — Маск тарафдор бўлган криптовалютага ишора қилади.
Изоҳ (0)