Microsoft асосчиларидан бири Билл Гейтс кўп йиллардан буён “The Gates Notes” (Гейтс қайдлари) номли блог юритиб келади. Унда миллиардер йил давомида ўқиган китобларидан энг сара ва севимли бешта асар ҳақида маълумот беради. Жорий йилда эса Гейтс атрофимиздаги дунёни ҳамда жамият бошдан кечираётган ўзгаришларни тушунишга ёрдам берадиган китоблар рўйхатини эълон қилди.
Китоблар муҳандислик соҳасидаги инновацион ғоялар бўйича қўлланма, сунъий интеллектнинг ҳаётимизга таъсири, замонавий технологиянинг ёшлар ҳаётидаги ўрни ҳақидаги турли мавзуларни ўз ичига олади.
“Тугалланмаган севги ҳикояси” — Дорис Кернс Гудвин
“Мен доим Дорис Кирнс Гудвиннинг китобларини катта қизиқиш билан мутолаа қилганман, лекин унинг янги автобиографияси муаллифнинг шахсий ҳаётига бошқача нигоҳ билан қараш имконини берди”, дейди Билл Гейтс.
Китобда унинг Ричард Гудвин билан никоҳи ҳақида ҳикоя қилинади. Муаллифнинг турмуш ўртоғи АҚШ президентлари Жон Ф. Кеннеди ва Линдон Жонсоннинг сиёсий маслаҳатчиси бўлган. У Америка тарихидаги энг қийин даврлардан бирида яшаб ўтган.
“Дориснинг истеъдоди туфайли асардаги севги ҳикояси Кеннедининг ўлдирилиши ёки Вьетнам уруши каби муҳим тарихий воқеалар каби таъсирчан чиққан”, деб ёзади Гейтс.
“Муҳандислик соҳасига оддий назар” — Гренди Ҳиллҳаус
Гейтснинг сўзларига кўра, мазкур китоб нима учун қувур ёки трансформатор каби тушунарсиз объектлар керак эканлиги ҳақидаги саволларга жавоб беради. Ҳиллҳаус уяли алоқа миноралардан тортиб кабел қутиларигача замонавий инфратузилма қандай ишлаши ҳақида батафсил тушунтириб берган.
“Бу асар бизни ўраб турган дунёнинг кўплаб сирларини очиб беради” дейди миллиардер.
“Яқинлашиб келаётган тўлқин” — Мустафо Сулаймон
Гейтс мазкур асарни сунъий интеллект ҳақидаги ўқиган барча китоблари ичида энг яхшиси, деб ҳисоблайди. Унда Мустафо Сулаймон сунъий интеллект ва илмий тадқиқотлар бўйича ўз тажрибаси билан ўртоқлашган. У биотехнология ва генларни таҳрирлаш каби замонавий технологиялар дунёни қандай тарзда ўзгартириб бораётгани ҳақида илмий далиллар келтирган.
Шунингдек, муаллиф инсоният дуч келадиган имкониятлар ва таҳдидлар, янги технологиялар имкониятларини максимал даражада ошириш учун хавф-хатарлардан қандай қочиш кераклиги ҳақида батафсил маълумот берган ҳамда сунъий интеллектнинг афзалликлари ва камчиликларини ҳам ёритган.
“Ташвишда қолган авлод” — Жонатан Ҳайдт
“Ушбу китобни ёшларга таълим бераётган ёки улар билан ишлаётганлар ўқиши шарт. Бу асар мени катталар назоратисиз кўчаларда, саргузаштлар ва ҳазиллар билан ўтказган болалигим ҳақида ўйлашга мажбур қилди”, дейди Microsoft асосчиси.
Муаллиф фаол ва бебош болаликдан рақамли ва технологиялар асридаги болаликка ўтиш янги авлоднинг ҳиссий ривожланишига қандай таъсир қилиши ҳақида маълумот берган. Гейтсга Жонатан Ҳайдтнинг нафақат муаммони ёритиши, балки вазиятни ўзгартиришга ёрдам берадиган турли ечимларни таклиф қилиши айниқса ёқди.
“Федерер”, Дорис Ҳенкел
Билл Гейтс асосчиси Рожер Федерер ҳақидаги мазкур китобни “теннис мухлислари учун ажойиб совға”, ва “швэтсариялик теннисчи мухлислари учун эса “хазинанинг ўзгинаси” деб атади. Нашр кўплаб нодир ва тарихий фотосуратларни ўз ичига олади ва спортчининг карьерасига чуқурроқ назар ташлайди.
Изоҳ (0)