Европа иттифоқи 2023 йил октябрь ойидан бери Яқин Шарқдаги можароларни ёритган 130 га яқин журналист ўлдирилганини маълум қилди. Европа иттифоқининг дипломатия бўйича раҳбари Жосеп Боррель мазкур ҳолатни қоралади.
“Журналистлар Яқин Шарқдаги можароларни ёритишда катта хавф остида қолмоқда. Бугун Ливанда Исроил армияси ҳужуми оқибатида уч нафар ОАВ ходими ҳалок бўлди. Ғазо секторида сўнгги бир йил ичида деярли 130 нафар журналист ўлган. Биз буни қоралаймиз ва матбуот эркинлиги, шу жумладан, журналистлар учун эркинлик кафолатланиши ҳамда журналистлар ҳар доим ҳимоя қилиниши керак”, дея таъкидлади у.
2023 йил 7 октябрда Ғазо секторидан Исроил ҳудудига ҲАМАС жангчиларининг кириб келишидан кейин Яқин Шарқдаги вазият кескин ёмонлашди. ҲАМАС бу ҳужумни Исроил расмийларининг Қуддусдаги “Ал-Ақсо” масжидига қарши ҳаракатларига жавоб деб атади.
Исроил Ғазо секторини тўлиқ блокадага олганини эълон қилиб, Фаластин анклавига ҳамда Ливан ва Суриянинг бир қисмига зарбалар бера бошлади.
Бир қатор давлатлар Яқин Шарқдаги можарони иложи борича тезроқ ижобий ҳал этиш учун кўрсатаётган саъй-ҳаракатларига қарамай, ҳозирча кескинлик пасаймаяпти.
Изоҳ (0)