Европа дипломатияси раҳбари Жосеп Боррел БМТ Исроил ҳукумати томонидан “барча жабҳада” ҳужумга учраганини айтди.
Мисол тариқасида у октябрь ойи бошида Исроил Кнессети БМТнинг Яқин Шарқдаги Фаластинлик қочқинларга ёрдам кўрсатиш агентлиги (UNRWA) фаолиятини тақиқловчи қонун лойиҳасини маъқуллаганини эслатди.
“БМТ бош котиби Антонио Гутеррес антисемит сифатида қабул қилинмоқда, UNRWA террорчи сифатида қабул қилинмоқда, бутун БМТ тизими ҳужумга учрамоқда”, деди Боррел Брюсселдаги Европа Иттифоқи саммитида.
2 октябрь куни Исроил Ташқи ишлар вазирлиги Антониу Гутерришни персона нон грата деб эълон қилди ва унинг мамлакатга киришини тақиқлади. Қарор Гутерриш Эроннинг ракета ҳужумини “очиқ қораламагани” учун қабул қилингани айтилган.
Жосеп Боррел, шунингдек, ЕИ Кенгаши саммит чоғида Исроил ҳарбийларининг Ливандаги Муваққат кучлар базасига (UNIFIL) ҳужумини қоралашига умид билдирди. У ерда бир неча нафар тинчликпарвар кучлар яраланган, деди Боррел. БМТ тинчликпарвар кучларининг хабар қилишича, 13 октябрь куни Исроил армияси улар қароргоҳини танкдан ўққа тутган.
Исроил Ташқи ишлар вазирлиги воқеани бахтсиз ҳодиса деб атади. Исроил бош вазири Биньямин Нетаньяху "Ҳизбуллоҳ" UNIFIL орқасида яшириниб, тинчликпарвар кучлардан “тирик қалқони” сифатида фойдаланаётганини айтди.
Изоҳ (0)