Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел Европа ҳамжамиятини Исроил ва Фаластиннинг ҲАМАС ҳаракати ўртасидаги уруш фонида Украина ҳудудидаги ҳарбий амалиётларни унутмасликка чақирди.
“Ким Судандаги вазият ҳақида гапиряпти? Ким Африка ҳақида гапиряпти? Саҳел ҳақида ким гапиряпти? Кўп йиллар давомида мавжуд бўлган низолар ҳақида ким гапиради? Бизнинг жамиятимиз бир вақтнинг ўзида фақат битта аниқ можаро ҳақида гапира оладиганга ўхшайди. Ҳозирда бу Фаластин ва Исроилдаги инқироз.
Аммо Украинадаги уруш ҳар куни давом этмоқда ва кўплаб одамларнинг ҳаётига зомин бўлмоқда. Шунинг учун биз мудофаамизни ривожлантиришни ва Украина мудофаасини қўллаб-қувватлашни камайтира олмаймиз, чунки охир-оқибат улар бир хил аҳамиятга эга. Келажагимиз учун кураш”, — деди Боррел Европа мудофаа агентлигининг йиллик конференциясида.
27 ноябрь куни Европа дипломатияси раҳбари Ғазо секторидаги вазият туфайли ЕИ учун Украина бўйича қарорларни қўллаб-қувватлашга эришиш қийинроқ бўлишини айтди.
Унинг тушунтиришича, айрим давлатлар Европа Иттифоқи билан “муносабатларини узган” ёки иттифоқнинг Ғазо бўйича позицияси ўзиники билан мос келмаслигини элчилар орқали маълум қилган.
Изоҳ (0)