Украинанинг собиқ президенти ва Олий Рада депутати Пётр Порошенко амалдаги давлат раҳбари Владимир Зеленскийга мурожаат қилиб, парламентга урушнинг тугашига олиб келиши керак бўлган “ғалаба режаси”ни тақдим этишга чақирди.
Шарқий Европа ҳисобот бюросига кўра, бу ҳақда Европа бирдамлик партияси раиси бўлган Порошенко Олий Раданинг бугунги йиғилишида айтиб ўтган.
“Мамлакат учинчи катта урушни бошидан кечирмоқда, бу қандай тугайди, деган савол бизни хавотирга солмоқда, Украина парламентар мамлакат ва президент бундай режани парламент билан муҳокама қилиши керак”, деди Порошенко.
Аввалроқ Европа иттифоқи дипломатияси раҳбари Жозеп Боррел Ғарбнинг ҳарбий ва иқтисодий ёрдами бўлмаса, Украинадаги уруш икки ҳафта ичида тугашини айтиб ўтганди.
“Кўпчилик бу можаронинг тезроқ тугашини хоҳлайди. Агар биз Украинани қўллаб-қувватлашни тўхтацак, 15 кундан сўнг уруш тугайди ва Путин ўз мақсадларига эришади”, деди Боррел.
Сентябрь ойида Владимир Зеленский Украинанинг ғалаба режаси тўртта асосий ва битта қўшимча бандни ўз ичига олишини маълум қилганди.
Изоҳ (0)