Европа Иттифоқи дипломатияси раҳбари Жозеп Боррелл эртага ҳалок бўладиганларга гуманитар ёрдам кўрсатишни маъносиз деб ҳисоблашини, шу боис Фаластин-Исроил можаросини ҳал қилиш учун аниқ қадамлар қўйиш кераклигини айтиб ўтди.
“Биз тинч аҳолининг азоб-уқубатларини енгиллаштиришимиз керак. Бунинг учун эса инсонпарварлик ёрдами ҳажмини оширишимиз керак. Лекин эртаси куни ҳалок бўладиган одамга овқат беришнинг маъноси йўқ. Бомбардимонларни тўхтатиб, кўпроқ ўлимларнинг олдини олишимиз керак. Инсонпарварлик ёрдами зарур, аммо бу етарли эмас”, — деди у Барселонадаги Ўрта Ер денгизи форуми иттифоқи йиғилиши якунлари бўйича ўтказилган матбуот анжуманида.
Форум бош котиби Носир Комил, Испания ва Иордания ташқи ишлар вазирлари Хосе Мануэл Альбарес ва Айман Сафади билан бирга ОАВга интервью берган Боррел ҳозирча доимий сулҳ келишувига эришиш устувор вазифа эканини айтди. Бундан ташқари, у ҲАМАС Ғазо устидан ҳарбий назоратни йўқотиши кераклигига эътибор қаратди.
Фаластин давлати ғоясини ҳимоя қилиб, Европа Иттифоқининг ташқи сиёсат бўйича раҳбари бу масалада муваффақиятга эришиш учун яна учта муҳим жиҳатни санаб ўтди: Исроилнинг Ғазони “қайта мустамлака қилишига” йўл қўймаслик, Ғарбий Соҳилдаги ноқонуний мустамлакачилигига чек қўйиш ва Фаластин маъмуриятига Ғазога қайтишга рухсат бериш.
Изоҳ (0)