Европа Иттифоқи дипломатияси раҳбари Жозеп Боррел Исроил молия вазири Бэтсалел Смотрич ва миллий хавфсизлик вазири Итамар Бен-Гвирга “нафрат уйғотгани” ва “инсон ҳуқуқларини бузгани” учун санкциялар киритишни таклиф қилди. Бу ҳақда Deutsche Welle хабар берди.
Боррелнинг таклифи Европа Иттифоқининг 27 мамлакати ташқи ишлар вазирлари саммити арафасида айтилган. Смотрич ва Бен-Гвир Ғазо сектори аҳолисига инсонпарварлик ёрдами етказиб беришни тўхтатишга чақирганди. Бен-Гвир шу йўл билан ҲАМАСни таслим бўлишга ундашни мўлжаллаган. Смотрич эса Фаластин ҳаракати исроиллик гаровга олинганларни озод қилади, деб умид қилган.
Исроил молия вазири Ғазо секторининг бундай блокадасини, ҳатто унинг икки миллион аҳолиси очликдан ҳалок бўлса ҳам, “асосли” деб атаган.
Жозеп Боррел Исроил вазирларига қарши жорий этишни таклиф этаётган санкциялар уларнинг Европа Иттифоқидаги активларини музлатиш ва Европа Иттифоқига киришни тақиқлашни назарда тутади.
Аввалроқ Смотрич ва Бен-Гвир ҲАМАС билан потенциал ярашишга қатъиян қарши экани маълум бўлганди. Шунингдек, миллий хавфсизлик вазири Ал-Ақсо мажмуасида яҳудий синагогасини қуришни илгари суриб, мажмуада яҳудийларнинг ибодат қилишига ҳам рухсат беришга чақирганди.
Изоҳ (0)