Европа Иттифоқи дипломатияси раҳбари Жозеп Боррел Эрон Қуролли кучларининг элита бўлинмасини террорчилик ташкилотлари рўйхатига киритиш ҳозирча имконсизлигини айтди. Бу ҳақда тегишли манбаларга таяниб, “ТАСС” хабар берди.
“Биз бир неча бор Ислом инқилоби қўриқчилари корпусини террорчилик ташкилотлари рўйхатига қўшиш масаласини муҳокама қилганмиз. Бироқ бунинг учун аъзо давлатнинг суд органи ташкилот террорчилик ҳаракатини содир этган, деб ҳисоблаши керак. Айни пайтда бундай эмас”, — дейди Боррел.
Теҳронга қарши янги санкциялар ҳақида гапирар экан, дипломат бунинг учун, биринчи навбатда, “санкция қилиниши мумкин бўлган нарсалар” кераклигини таъкидлаган.
Аввалроқ Еврокомиссия раҳбари Урсула фон дер Ляен Европа Иттифоқи сўнгги воқеалар муносабати билан Эронга қарши санкцияларни кенгайтириш, хусусан, Теҳроннинг дрон ва ракеталарни ишлаб чиқаришига қарши санкцияларни кўриб чиқишини маълум қилганди.
Эрон армияси мамлакатнинг Суриядаги консуллиги Исроил самолётлари томонидан йўқ қилинишига жавобан 14 апрелга ўтар кечаси Исроилга зарба берди. Ҳужум, турли манбаларга кўра, бир неча юз ракеталар ва дронлар, жумладан, Shahed камикадзе дронлари, Fattoh ва Fattoh-2 гипертовушли ракеталари билан амалга оширилган. Эрон давлат телеканали Press TV барча гипертовушли ракеталар нишонга етганини хабар қилган.
Исроил армияси Эрон 170 га яқин дрон, 30 дан ортиқ қанотли ракеталар ва 120 дан ортиқ баллистик ракеталарни учирганини айтиб, фақат бир нечта ракеталар мамлакатгача етиб келганини ва кичик зарар келтирганини таъкидлаган.
Эрон расмийси Исроил жавоб чорасини кўрса, Эроннинг навбатдаги операцияси аввалгисидан кўра каттароқ бўлиши ҳақида огоҳлантирган.
Исроил вазири Бенни Ганцнинг айтишича, мамлакат Эрон таҳдидига қарши минтақавий коалиция тузиш ва ҳужумга тегишли вақтда ва мос тарзда жавоб бериш ниятида.
Изоҳ (0)