Европа Иттифоқи КХДР Россияга ўз қўшинларини Украинага қарши урушда қатнашиш учун жўнатаётгани ҳақидаги хабарларнинг кўпайишидан чуқур хавотир билдирди.
“Агар бундай маълумотлар тасдиқланса, бу КХДР томонидан Европа ҳамда глобал тинчлик ва хавфсизлик учун жиддий оқибатларга олиб келадиган бир томонлама душманлик ҳаракати сифатида қабул қилинади”, дейилади ЕИ дипломатияси раҳбари Жосеп Боррелнинг баёнотида.
Боррелнинг таъкидлашича, Шимолий Кореянинг урушдаги иштироки “халқаро ҳуқуқни, жумладан, БМТ Низомининг энг фундаментал тамойилларини жиддий бузиш бўлади”. Бундан ташқари, ЕИ Москва ва Пхеньян ўртасидаги ҳарбий ҳамкорликнинг чуқурлашишини, хусусан, “БМТ Хавфсизлик Кенгашининг кўплаб резолюцияларини қўпол равишда бузаётган” қурол-яроғ етказиб беришни кескин қоралайди.
Шу муносабат билан ЕИ Шимолий Кореяни Россиянинг ноқонуний ҳарбий ҳаракатларини қўллаб-қувватлашни тўхтатишга чақирди, шунингдек, ўз ҳаракатларини, жумладан, жавоб чораларини халқаро ҳамкорлар билан мувофиқлаштиришини эслатиб ўтди.
“Шимолий Кореянинг ушбу ҳаракатлари Россия минтақада ва бутун дунёда қандай қилиб беқарорлик ва кескинликни келтириб чиқараётганини кўрсатади”, деб таъкидлади Боррел.
Унинг қўшимча қилишича, “музокаралар олиб боришга тайёрлигини билдирганига қарамай, Россия адолатли, кенг қамровли ва мустаҳкам тинчликдан самимий манфаатдор эмас”.
“Россия расмийлари Пхеньяннинг ядро қуролига эга бўлиш истагини қўллаб-қувватлаб, Россиянинг БМТ Хавфсизлик Кенгаши аъзоси сифатидаги масъулиятига путур етказмоқда”, дейди дипломат.
Росссия президенти Владимир Путин 24 октябрь куни БРИКС саммити доирасида илк бор мамлакатида Шимолий Корея ҳарбийлари борлиги ҳақидаги хабарларга муносабат билдирди.
Путин тегишли саволга жавоб берар экан, КХДР билан стратегик ҳамкорлик тўғрисидаги шартномани эслатиб ўтди.
“Бугун, менимча, бизнинг стратегик ҳамкорлик тўғрисидаги шартномамиз ратификация қилинди. Унда 4-модда мавжуд. Биз Шимолий Корея раҳбарияти келишувларимизга жиддий ёндашишига ҳеч қачон шубҳа қилмаган эдик. Бу модда доирасида нима ва қандай йўл тутишимиз — бизнинг ишимиз”, деди Россия етакчиси.
Жанубий Корея разведкаси маълумотларига кўра, Пхеньян Россияга 12 минг аскар жўнатиши мумкин ва уларнинг бир қисми аллақачон Узоқ Шарқдаги базаларга етиб борган. Улар эҳтимол Украина билан урушга жўнатилиши мумкин, шимолий кореялик ракета офицерлари эса аллақачон урушда қатнашаётгани айтилганди. Бироқ Шимолий Корея ўз аскарларини урушда иштирок этиш учун Россияга юборгани ҳақидаги маълумотни “асоссиз миш-мишлар” деб атаган.
Изоҳ (0)