Yevropa ittifoqi 2023-yil oktyabr oyidan beri Yaqin Sharqdagi mojarolarni yoritgan 130 ga yaqin jurnalist o‘ldirilganini ma’lum qildi. Yevropa ittifoqining diplomatiya bo‘yicha rahbari Josep Borrel mazkur holatni qoraladi.
“Jurnalistlar Yaqin Sharqdagi mojarolarni yoritishda katta xavf ostida qolmoqda. Bugun Livanda Isroil armiyasi hujumi oqibatida uch nafar OAV xodimi halok bo‘ldi. G‘azo sektorida so‘nggi bir yil ichida deyarli 130 nafar jurnalist o‘lgan. Biz buni qoralaymiz va matbuot erkinligi, shu jumladan, jurnalistlar uchun erkinlik kafolatlanishi hamda jurnalistlar har doim himoya qilinishi kerak”, deya ta’kidladi u.
2023-yil 7-oktyabrda G‘azo sektoridan Isroil hududiga HAMAS jangchilarining kirib kelishidan keyin Yaqin Sharqdagi vaziyat keskin yomonlashdi. HAMAS bu hujumni Isroil rasmiylarining Quddusdagi “Al-Aqso” masjidiga qarshi harakatlariga javob deb atadi.
Isroil G‘azo sektorini to‘liq blokadaga olganini e’lon qilib, Falastin anklaviga hamda Livan va Suriyaning bir qismiga zarbalar bera boshladi.
Bir qator davlatlar Yaqin Sharqdagi mojaroni iloji boricha tezroq ijobiy hal etish uchun ko‘rsatayotgan sa’y-harakatlariga qaramay, hozircha keskinlik pasaymayapti.
Izoh (0)