Европа Иттифоқи Украинага 50 миллиард доллар кредит ажратилишини кафолатлаш мақсадида Россия активларини блокировка қилиш билан боғлиқ санкциялар режимини уч йилдан беш йилгача узайтириш бўйича таклифларни кўриб чиқмоқда, деб хабар бермоқда Bloomberg манбаларга таяниб.
Европа Комиссияси томонидан таклиф қилинган вариантлардан бири активларни музлатишнинг янгиланган шартларини 36 ойгача узайтириш, деди музокаралар бориши билан таниш бўлган агентлик суҳбатдошлари.
Яна бир таклиф активларни музлатиш муддатини ҳар сафар беш йилга узайтиришдан иборат. Учинчи режада Россияга қарши ҳам тармоқ санкциялари, ҳам активларни музлатиш муддатини 36 ойга узайтириш кўзда тутилган.
Агентлик суҳбатдошларига кўра, Европа Иттифоқи давлатларининг доимий вакиллари активларга нисбатан санкциялар муддатини уч йилга узайтириш энг мақбул режа деб ҳисобламоқда.
Манбалар, шунингдек, ҳозирда Европа Иттифоқи кенгашига раислик қилаётган Венгрия ўз позициясини эгалламаганини айтди.
Қайд этилишича, EК 16 сентябрдаёқ санкциялар режимини қандай ўзгартириш мумкинлиги ҳақида батафсилроқ маълумот бериши мумкин.
- Аввалроқ ЕИ дипломатияси раҳбари Жосеп Боррел ЕИ аллақачон Россиянинг музлатилган активларидан тушган даромадни Украина томонига ва Киевга қурол етказиб берувчи иттифоқ мамлакатларига ўтказишни бошлаганини маълум қилганди.
- Июнь ойида Италияда бўлиб ўтган G7 саммити иштирокчилари Россиянинг музлатилган активларидан тушган маблағларни Украинага ёрдам бериш учун ишлатиш бўйича сиёсий келишувга эришган эди.
Изоҳ (0)