Ғазо секторидаги тинч аҳоли зарур шароитлар яратилгач, уйига қайтиши керак. Бу ҳақда 7 январь куни Қатар пойтахти Доҳада бўлиб ўтган матбуот анжуманида АҚШ давлат котиби Энтони Блинкен маълум қилди. Ғазо тинч аҳолисига минтақани тарк этиши учун босим ўтказишни қабул қилиб бўлмайди, деди дипломат.
Иорданияга ташрифи чоғида Блинкен Ғазо секторидаги гуманитар вазият ёмонлашганини таъкидлади. У Исроилга бўлажак ташрифи чоғида расмийларга Ғазо секторида тинч аҳоли қурбон бўлишининг олдини олиш учун кўпроқ ҳаракат қилиш зарурлигини айтмоқчи.
Шу билан бирга, АҚШ Давлат департаменти раҳбари минтақадаги “чуқур кескинлик”дан хавотир билдирди. Яқин Шарқ можароси “метастазалар” бериши ва “ янада кўпроқ беқарорлик ва азоб-уқубатларга” олиб келиши мумкин, деб огоҳлантирди Блинкен.
Яқин Шарқдаги ғарб дипломатлари
АҚШ давлат котиби Яқин Шарқ бўйлаб сафари доирасида Иордан дарёси Ғарбий соҳили, Бирлашган Араб Амирликлари, Саудия Арабистони ва Мисрга ҳам ташриф буюради. Америка дипломатининг сафари ғарб давлатларининг можаро авж олиши олдини олишга қаратилган саъй-ҳаракатлари фонида амалга оширилмоқда.
Худди шу кунларда Германия ташқи ишлар вазири Анналена Бербок ва Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел ҳам минтақада бўлиб турибди. Германия ташқи ишлар вазири аввалроқ Исроилни Ғазо секторидаги тинч аҳолини ҳимоя қилишга чақирганди.
Изоҳ (0)