Rossiya prezidenti Vladimir Putin uchinchi jahon urushi boshlanishi xavfi uni tashvishga solayotganini e’tirof etdi. Bu haqda u Sankt-Peterburg xalqaro iqtisodiy forumi yalpi majlisi davomida ma’lum qildi, deya xabar bermoqda “Lenta.ru”.
Forum davomida moderator Ikkinchi jahon urushi tugaganining 80 yilligi yaqinda nishonlanganini ta’kidlab, Putindan dunyoning uchinchi jahon urushiga “yaqinlashayotgani” uni tashvishga solyaptimi, deb so‘ragan.
“Tashvishlantiryapti, juda tashvishlantiryapti. Hech qanday kinoyasiz, hazilsiz aytyapmanki, albatta, mojaro ehtimoli juda yuqori. Burnimizning tagida — Ukrainada, shuningdek Yaqin Sharqda bo‘layotgan voqealar. Bularning oqibati nima bo‘lishi mumkinligi bizni tashvishga solmoqda”, deya javob bergan Putin.
Shuningdek, Rossiya prezidenti Eron yadro obyektlari atrofidagi vaziyatdan ham xavotirini bildirgan.
“Buning oqibati nima bo‘lishi mumkinligi bizni tashvishga solmoqda. Bu, shubhasiz, bizdan nafaqat sodir bo‘layotgan voqealarga e’tiborli munosabatda bo‘lishni, balki yechimlarni, qarorlarni izlashni, ayniqsa, tinch yo‘l bilan topishni talab qiladi”, deydi Rossiya prezidenti.
Bundan avval Rossiya Federatsiyasi prezidenti Vladimir Putin Birlashgan Arab Amirliklari prezidenti Muhammad bin Zoid Ol Nahayon bilan suhbatda Rossiyaning Eron va Isroil o‘rtasidagi muloqotda vositachilik qilishga tayyorligini ma’lum qilgandi.
Izoh (0)