Yevropa Ittifoqi muzlatilgan Rossiya aktivlaridan yuzlab milliard yevrolarni olib, mablag‘larni Ukrainaga yordamni kuchaytirishi mumkin bo‘lgan xavfliroq investitsiya fondiga o‘tkazmoqchi. Bu haqda Politico xabar berdi.
Yevropa Ittifoqi ijroiya organi Belgiyada muzlatilgan Rossiya davlat aktivlarining taxminan 229 milliard dollarini xavfliroq investitsiya fondiga o‘tkazish imkoniyatini ko‘rib chiqmoqda. Natijada undan ko‘proq foyda olish ko‘zda tutilgan.
Yevropa Ittifoqining maqsadi ko‘proq foyda olish va urushdan vayron bo‘lgan Ukraina iqtisodiyotini saqlab qolishga yordam berish ekani aytilgan. Ushbu aktivlar 2022-yilda Rossiyaning keng ko‘lamli bosqiniga javoban muzlatilgan edi.
Bu qadam Rossiya aktivlarining to‘liq musodara qilinishiga olib kelmaydi. Yevropa Ittifoqining bir qator davlatlari, jumladan Germaniya va Italiya bunga qarshi chiqmoqda. Rasmiylarning aytishicha, Yevropa Ittifoqi faqat foizlardan foydalanib, xalqaro huquqni buzganlikda ayblanishdan qochishga umid qilmoqda.
2024-yilda G7 sanoati rivojlangan davlatlar guruhi a’zolari Ukrainaga muzlatilgan aktivlarni investitsiya qilishdan olingan taxminan 51,5 milliard dollarni berishga kelishib olgandi. Yevropa Ittifoqining G7 kreditidagi ulushi taxminan 20,6 milliard dollarni tashkil etadi va yil oxirigacha qaytarilishi aytilgan. Rasmiylarga ko‘ra, Yevropa Ittifoqi moliya vazirlari bu masalani 19-iyundayoq Lyuksemburgdagi norasmiy kechki ovqatda muhokama qiladi.
Fransiya prezidenti Emmanuel Makron Rossiyaning muzlatilgan aktivlari urushdan keyin Ukrainani tiklash uchun ishlatilishi kerakligini aytgandi. Biroq uning ta’kidlashicha, hozirda bunday harakatlar uchun “qonuniy asos yo‘q”.
Makron, shuningdek, Ukrainani qo‘llab-quvvatlash, xususan, Ukraina armiyasini mustahkamlash muhimligini qayd etgandi. Unga ko‘ra, tinchlik kelishuvi tuzilgandan so‘ng, xavfsizlikning asosiy kafolati Ukraina mudofaa kuchlarini mustahkamlash bo‘lishi kerak.
Izoh (0)