Rossiya prezidenti Vladimir Putin mamlakatning Quruqlik qo‘shinlari bosh qo‘mondoni Oleg Salyukovni lavozimidan ozod qildi. U Xavfsizlik kengashi kotibining o‘rinbosari etib tayinlandi. Tegishli farmon huquqiy axborot portalida e’lon qilindi.
Oleg Leonidovich Salyukov egallab turgan lavozimidan ozod etilib, Rossiya Xavfsizlik kengashi kotibining o‘rinbosari etib tayinlansin, deyiladi hujjatda.
Salyukov 2008—2010-yillarda Uzoq Sharq harbiy okrugi qo‘shinlariga qo‘mondonlik qilgan, shundan so‘ng 2014-yilgacha Rossiya Qurolli kuchlari Bosh shtabi boshlig‘i o‘rinbosari vazifasini bajargan. 2014-yil may oyida prezident farmoni bilan Quruqlik qo‘shinlari bosh qo‘mondoni etib tayinlangan.
2023-yilda u Ukrainadagi Rossiya qo‘shinlari birlashgan guruhi qo‘mondoni o‘rinbosari lavozimiga tayinlangan. Bundan tashqari, Salyukov 2025-yil 9-may kuni G‘alabaning 80 yilligi munosabati bilan Qizil maydonda o‘tkazilgan harbiy paradga qo‘mondonlik qilgan.
Yangi lavozimga tayinlanish generalning yaqinlashib kelayotgan 70 yillik yubileyi arafasida amalga oshirildi. 21-may kuni Salyukov harbiy xizmat uchun belgilangan yosh chegarasiga yetadi. Qonunchilikka ko‘ra, bu yoshdagi zobitlar, agar ularga nisbatan shaxsiy istisno nazarda tutilmagan bo‘lsa, qurolli kuchlar safini tark etishi shart.
Salyukov Rossiyaning Ukrainaga keng ko‘lamli bostirib kirishi munosabati bilan bir qator G‘arb davlatlari tomonidan sanksiyalar ostida qolmoqda. U a’zo bo‘lgan Rossiya Xavfsizlik kengashiga 2024-yildan beri sobiq mudofaa vaziri Sergey Shoygu rahbarlik qilmoqda.
Quruqlikdagi qo‘shinlar bosh qo‘mondoni kim bo‘lishi hali rasman ma’lum qilinmagan. Rossiya Telegram-kanallariga ko‘ra, bu lavozimga Markaziy okrug qo‘shinlariga qo‘mondonlik qilgan general-polkovnik Andrey Mordvichev tayinlangan. U 2022-yil bahorida Rossiya qo‘shinlarining Mariupol va “Azovstal” zavodiga bostirib kirishiga rahbarlik qilgan. Ukrainada Mordvichev uchta jinoiy modda, jumladan, agressiv urush olib borish moddasi bo‘yicha ayblanmoqda.
Izoh (0)