Yevropa Ittifoqi Rossiyani harbiy texnologiyalardan mahrum etuvchi va uning energiya savdosidan olinadigan daromadlarini kamaytirishga qaratilgan 17-sanksiyalar paketini tasdiqladi. Cheklovlar doirasida O‘zbekiston kompaniyasiga ham sanksiya joriy etildi.
Sanksiyalar Rossiyaning “soyadagi floti” deb ataluvchi neft tankerlariga, ularning operatorlariga hamda mamlakatning eng yirik neft ishlab chiqaruvchilardan biriga qaratilgan. Ukrainaga qarshi urushda Rossiya harbiy-sanoat majmuasini qo‘llab-quvvatlagani uchun 31 ta kompaniya ham ro‘yxatga kiritilgan.
Ular orasida O‘zbekistonda ro‘yxatdan o‘tgan Trade Engine System kompaniyasi ham bor. Ustav fondi 10 million so‘m bo‘lgan bu kompaniya 2022-yil iyul oyida tashkil etilgan. U “temir yo‘l, avtotransport, dengiz va havo yo‘llarida yuk tashishni tashkil etish” faoliyati bilan shug‘ullanadi. Kompaniyaning yagona ta’sischisi va direktori — Akbarov Nosirjon Xamitjanovich.
Yangi sanksiyalar paketi urush boshlanganidan buyon eng keng qamrovli bo‘lib, gibrid choralarni, inson huquqlarini buzganlik uchun jazo choralarini hamda kimyoviy qurollar bilan bog‘liq sanksiyalarni o‘z ichiga oladi. Putin tinchlikka intilayotgandek ko‘rinayotgan bir paytda, yangi sanksiyalar tayyorlanmoqda.
Rossiya va unga ko‘maklashayotganlarning harakatlari jiddiy oqibatlarga olib keladi. Rossiya o‘zining noqonuniy va shafqatsiz urushini qanchalik uzoq davom ettirsa, bizning javobimiz shunchalik qattiq bo‘ladi, dedi Yevropa diplomatiyasi rahbari Kaya Kallas.
Sanksiyalar ro‘yxatiga uchinchi mamlakatlarga tegishli 189 ta kema kiritilgan. Natijada sanksiya ostidagi kemalar soni 342 taga yetgan. Yevropa Ittifoqi “soyadagi flot” faoliyatini ta’minlovchi yuridik shaxslarga nisbatan ham individual sanksiyalar joriy qilgan. Bu ro‘yxatga Rossiya neftini tashiyotgan BAA, Turkiya va Gonkongda ro‘yxatdan o‘tgan firmalar ham kiradi.
Yevropa Ittifoqi neft narxini cheklash va “soyadagi flot”ga qarshi sanksiyalar kiritganidan beri Rossiyaning tegishli daromadlari 38 milliard yevroga kamaygan. 2025-yil mart holatiga ko‘ra, Rossiyaning bu yo‘nalishdagi daromadlari 2023-yil martiga nisbatan 13,7 foizga, 2022-yilga nisbatan esa 20,3 foizga qisqargan.
Yevropa Ittifoqining avvalgi sanksiyalar paketi 24-fevral kuni — Rossiyaning Ukrainaga keng ko‘lamli bostirib kirishi boshlanganining uch yilligi munosabati bilan joriy etilgan edi. O‘zbekiston kompaniyalari orasida Uzstanex ham cheklovlarga uchragandi, unga qarshi avvalroq AQSH va Buyuk Britaniya sanksiyalari joriy etilgan edi.
Izoh (0)