Rossiya prezidenti Vladimir Putin 20-may kuni amaliy tashrifi doirasida Kursk viloyatiga borganida Ukraina qurolli kuchlari dronlar hujumini amalga oshirdi. Bu haqda Rosssiy ommaviy axborot vositalari xabar berdi.
Xabarga ko‘ra, prezident vertolyoti dronlar hujumi markazida bo‘lgan. Rossiyaning havo hujumidan mudofaa tizimlari 46 ta dronni urib tushirgan. Havo hujumidan mudofaa diviziyasi qo‘mondoni Yuriy Dashkin bu bo‘yicha ma‘lumot bergan.
Prezident Kursk viloyatida ishlayotgan davrda qarshi tomon dronlar bilan misli ko‘rilmagan hujum uyushtirdi. Bu hududdagi havo hujumidan mudofaa guruhi samolyot tipidagi 46 ta dronni yo‘q qildi, degan u.
Putinning Kurskka tashrifi
Rossiya prezidenti 20-may kuni Kursk viloyatiga tashrif buyurdi, bu haqda 21-may kuni prezident matbuot xizmati xabar berdi. Safar davomida Rossiya rahbari kurs ko‘ngillilari bilan uchrashuv o‘tkazdi, shuningdek, hududda qurilayotgan AES-2 ga tashrif buyurdi.
Bundan tashqari, Putin Kursk viloyati gubernatori vazifasini bajaruvchi Aleksandr Xinshteyn bilan uchrashdi. Bu Rossiya rahbarining urush boshlanganidan buyon Kurskka ikkinchi rasmiy tashrifi sanaladi. U mart oyida Kurskka borib, frontdagi vaziyat bilan tanishgan edi. Bu Ukraina kuchlari 2024-yilning 14-avgust kuni mazkur yo‘nalishda hujumga o‘tganidan beri ilk tashrif bo‘lgan.
Kurskka hujum
2024-yil 6-avgustda Ukraina armiyasi Rossiyaning Kursk viloyatida harbiy operatsiyani boshladi. 12-avgustga kelib 28 ta aholi punkti Ukraina kuchlari nazoratiga o‘tgani haqida o‘sha paytda viloyat gubernatori vazifasini bajaruvchi Aleksey Smirnov xabar berdi.
Yanvar oyida Rossiya Mudofaa vazirligi Ukraina tomoni mintaqaning 1 268 kv/km hududini egallab olganini ma’lum qildi (Kursk viloyatining umumiy maydoni — 29,9 ming kv/km).
2025-yil yanvar oyi o‘rtalariga kelib, Rossiya idorasi ma’lumotlariga ko‘ra, 801 kv/km (63,2 foiz) qaytarib olishga erishilgan. Fevral oyida esa Kursk viloyatining 64 foizi nazoratga qaytarilgan.
Zelenskiyning so‘zlariga ko‘ra, Kurskdagi operatsiyaning asosiy vazifasi Rossiyaning harbiy salohiyatini imkon qadar yo‘q qilish, qarshi hujumlarni kuchaytirish hamda Rossiya hududida bufer zona yaratishdan iboratdir. Aprel oyida Rossiya prezidenti Vladimir Putin Kursk viloyati to‘liq ozod etilganini e’lon qildi. Ukraina Qurolli kuchlari esa viloyatdagi janglar davom etayotganini ma’lum qildi.
Izoh (0)