Rossiya prezidenti Vladimir Putin tashqi ishlar vaziri Sergey Lavrovni imperator Pyotr I tomonidan ta’sis etilgan, keyinchalik 1998-yilda qayta tiklangan oliy davlat mukofoti — muqaddas havoriy Andrey Pervozvanniy ordeni bilan taqdirladi.
Rossiyaning bosh diplomati Sergey Viktorovich Lavrovning iste’dodi, bilimi, tajribasi va aql-zakovati unga nafaqat mamlakatimizda, balki butun dunyoda so‘zsiz hurmat keltirdi, deya Putin ordenni topshirdi.
Mazkur orden bilan o‘ttiz yil ichida atigi 28 kishi, jumladan, Belarus prezidenti Aleksandr Lukashenko taqdirlangandi.
Putin Lavrov “Vatan manfaati yo‘lida hajmi va murakkabligi jihatidan ulkan” ishlarni amalga oshirganini aytgan.
Eslatib o‘tamiz, hozirda Rossiya jahon iqtisodiyotining yarmini tashkil etuvchi davlatlarni “do‘st bo‘lmagan” deb hisoblamoqda. Ular orasida AQSH (YIM 28 trillion dollar), Yevropa Ittifoqi davlatlari (YIM 29 trillion dollar), Buyuk Britaniya (YIM 3,4 trillion dollar) va Yaponiya (4,2 trillion dollar) bor.
Kiritilgan sanksiyalar soni bo‘yicha esa Eron va Shimoliy Koreyani ortda qoldirib, jahon rekordchisi bo‘lib turibdi. 2025-yil boshidagi holatga ko‘ra, 17 mingdan ortiq cheklovlar joriy etilgan.
Tashqi ishlar vazirligida 50 yillik tajribaga ega xodim, Rossiyaning BMT Xavfsizlik kengashidagi sobiq doimiy vakili Lavrovning o‘zi Ukrainada urush boshlanganidan keyin jahon diplomatiyasidan chetlashtirildi.
Rossiyani izolyatsiya qilish mumkin emas, deb ta’kidlagan Lavrov Afrikani kezib yuribdi. Chunki uning boshqa boradigan joyi yo‘q. Boshqa qayerga ham borardi? Ilgari u doim Yevropada bo‘lar, turli anjumanlarda qatnashardi. Endi bunga chek qo‘yildi, dedi Tashqi va mudofaa siyosati bo‘yicha kengash rahbari Fedor Lukyanov.
Izoh (0)