Rossiya va O‘zbekiston migratsiya masalalarini birgalikda hal qilishga, muhojirlarni oldindan tayyorlashga kelishib oldi. Bu haqda Rossiya prezidenti Vladimir Putin nutqiga tayanib “TASS” xabar berdi.
Biz mehnat bozorida ham ijtimoiy xarakterdagi ko‘plab masalalar borligini tushunamiz. (O‘zbekiston prezidenti) Shavkat Miromonovich bilan migratsiya masalalarini birgalikda hal qilishga kelishib oldik. Chunki bizda mehnat bozori bugun qanday ahvolda ekani ma’lum.
Sizlarda (O‘zbekistonda) ma’lum darajada bosim kuzatilmoqda. Lekin nima qilishni birgalikda kelishib oldik. Rossiyada ishlashni xohlaydigan odamlarni tayyorlash masalasini hal etamiz, degan Putin dunyoning yetakchi axborot agentliklari rahbarlari bilan o‘tkazilgan uchrashuvda.
Uning so‘zlariga ko‘ra, yoshlar bilan ishlash muhim ahamiyatga ega. Shu sababli hozirda Rossiya va O‘zbekiston yoshlari o‘rtasidagi aloqalarni rivojlantirishga katta e’tibor qaratilmoqda.
Rossiyadagi reydda o‘zbekistonliklarga jismoniy kuch ishlatilgan
8-iyun kuni Moskvada o‘tkazilgan reydda mehnat faoliyatini olib borayotgan O‘zbekiston fuqarolariga nisbatan OMON jismoniy kuch qo‘llagandi. Migratsiya agentligining Rossiyadagi vakolatxonasi jabrlanganlar orasida O‘zbekiston fuqarolari bo‘lsa, jumladan, ularga tan jarohatlari yetkazilgan, huquqlari buzilgan yoki boshqa muammolarga duch kelgan bo‘lsa, murojaat qilishni so‘ragandi.
Muhojirlarga nisbatan shafqatsiz munosabat ortidan O‘zbekiston Tashqi ishlar vazirligi Rossiyaga nota yuborgandi. Unda holatga izoh berish, kuch ishlatar tashkilot vakillarining harakatlariga huquqiy baho berish so‘ralgan.
Shundan so‘ng Rossiya Tashqi ishlar vazirligi vakili Mariya Zaxarova nota diqqat bilan o‘rganilishini aytgandi. U o‘zbekistonlik hamkorlarning tegishli so‘rovi vakolatli organlarga yetkazilganini bildirgan. Olingan obyektiv ma’lumotlar belgilangan tartibda Toshkentga yuborilishini ta’kidlagan.
2025-yil aprel oyi oxirlarida Rossiyada o‘zbek migrantlari huquqlariga rioya etilishi nazorati kuchaytirilishi ma’lum qilingandi. Ikki davlat Bosh prokuraturalari migrantlarning huquqlariga rioya etilishi ustidan nazorat va kuzatuvni kuchaytirish majburiyatini olgandi.
Izoh (0)