“Rossiya Ukrainaning 5 ta viloyati bo‘yicha yon berdi” — Uitkoff

Rossiya Ukrainaning beshta hududi bo‘yicha yon berishga rozi bo‘ldi. Bu haqda AQSH prezidenti maxsus vakili Stiv Uitkoff ma’lum qildi.

AQSH prezidenti Donald Tramp 18-avgust kuni Ukraina rahbari Vladimir Zelenskiy bilan muzokara olib boradi. Uitkoffning so‘zlariga ko‘ra, ular “pirovardida Ukraina nazorati ostida bo‘lgan” hududlarni muhokama qiladi. Rossiyaning yon berishi shundan iboratki, u “butun Ukrainani o‘ziga qo‘shib olmaydi”, dedi Uitkoff.

Umid qilamanki, bu masalada ma’lum darajada aniqlikka erishamiz va yaqin orada bularning barchasi tinch yo‘l bilan hal etiladi, dedi Trampning maxsus vakili.

Shuningdek, u Alyaskadagi muzokaralar chog‘ida Putin Ukrainaga “jiddiy xavfsizlik kafolatlari” berishga va hatto “Ukraina hamda boshqa Yevropa mamlakatlariga hujum qilmaslik majburiyatini qonuniy jihatdan mustahkamlash”ga tayyor ekanini aytgan.

Uitkoff bu kelishuvlarni “burilish nuqtasi” deb atab, ularni darajasi jihatidan NATOning 5-moddasiga qiyos qildi. Unga ko‘ra, bir davlatga qilingan hujum barcha davlatlarga qilingan hujum sifatida baholanadi.

AQSH davlat kotibi Marko Rubio esa “kelishuvga erishishning yagona yo‘li — tomonlarning har ikkisi nimanidir qo‘lga kiritib, nimadandir voz kechishi” ekanini ta’kidladi. U shu sababli ertaga Zelenskiyning Alyaskaga tashrifi muhim ekanini qayd etdi.