Afg‘oniston va O‘zbekiston elektr energiyasini uzatish va podstansiyalar qurish bo‘yicha 243 million dollarlik to‘rtta shartnoma imzoladi. Bu haqda Afg‘onistonning DABS energetika kompaniyasi xabar berdi.
Tegishli shartnomalar DABS va O‘zbekiston Energetika vazirligi o‘rtasida imzolangan. Ular quyidagi loyihalarni o‘z ichiga oladi:
- 500 kilovoltli Surxon-Dasht-Alvon elektr uzatish liniyasini 1000 megavatt quvvat bilan kengaytirish.
- Arg‘andah podstansiyasini 800 megavolt-amper (MVA) quvvat bilan kengaytirish.
- Nangarhor viloyatida Shayx Mesri podstansiyasini qurish.
- 220 kilovoltli Kobul-Nangarhor (Shayx Mesri) elektr uzatish liniyasini kengaytirish.
Ushbu yirik loyihalarni imzolash marosimida Afg‘oniston tomonidan bosh vazirining iqtisodiy masalalar bo‘yicha o‘rinbosari Mulla Abdul G‘ani Barodar, Davlat korporatsiyalari bosh boshqarmasi rahbari Mavlaviy Ahmad Jan Bilol ishtirok etgan.
O‘zbekiston tomonidan esa energetika vaziri Jo‘rabek Mirzamahmudov va Afg‘oniston bo‘yicha maxsus vakil Ismatilla Ergashev qatnashgan. Marosim davomida DABS kompaniyasi direktori Abdul Bari Umar kelish Afg‘oniston elektr ta’minotini ta’minlashda muhim ekanini ta’kidlagan.
Ushbu loyihalar savdo, sanoat va qishloq xo‘jaligi sohalarini rivojlantirishga yordam beradi, natijada mamlakatning sezilarli taraqqiyotiga yo‘l ochadi, degan u.
O‘zbekiston energetika vaziri ham o‘z nutqida ushbu yirik loyihalar ikki davlatning mustahkam hamkorligi va doimiy sa’y-harakatlari natijasi ekanini bildirgan.
Mirzamahmudov ikki tomon yangi imzolangan loyihalarni amalga oshirishda birgalikda ishlashini aytgan.
Xuddi shu marosimda DABS va O‘zbekiston kompaniyalari o‘rtasida o‘n yil muddatga elektr energiyasini sotib olish bo‘yicha shartnoma imzolangan.
Izoh (0)