Ukraina armiyasi sobiq bosh qo‘mondoni Valeriy Zalujniy 1991-yilgi chegaralarni qaytarib olishga umid qilmaslikka chaqirdi. Bu haqda u “Xavfsizlik eksporti: dunyodagi Ukraina qurollari” forumida nutq so‘zladi.
Zalujniy 2024-yildan beri Ukrainaning Buyuk Britaniyada elchisi lavozimida faoliyat yuritib kelmoqda. U Rossiya urushni davom ettirish uchun yetarli resurslarga ega ekanini aytmoqda.
Umid qilamanki, bu zalda hali ham qandaydir mo‘jizani — oqqush kabi kelib, Ukrainaga tinchlik, 1991 yoki 2022-yil chegaralarini olib kiradigan biror qudratli kuchni kutayotgan odamlar qolmagan. Shaxsiy fikrimcha, dushman bizning hududimizga zarba berish va alohida hujum harakatlarini amalga oshirishga urinish uchun resurs, kuch va vositalarga ega ekan, hududni to‘liq qaytarib olish haqida gapirishga hali erta, degan u.
Uning so‘zlariga ko‘ra, Rossiyaning urushni davom ettirish qobiliyati to‘g‘ridan to‘g‘ri uning ixtiyoridagi resurslarga bog‘liq. 2023-yil oxiridan boshlab Rossiya urushni “charchatish” usulida olib bormoqda.
Zalujniy g‘alabaga faqat Rossiyaning harbiy harakatlar olib borish qobiliyati to‘liq yo‘q qilingandagina erishish mumkinligini aytdi. U Rossiyaning harbiy va iqtisodiy salohiyati butunlay yo‘q qilinishi kerakligini ta’kidladi.
Shuningdek, Zalujniy Ukrainada inson resurslari yetishmasligi va iqtisodiy vaziyat og‘irligiga e’tibor qaratdi.
Biz faqat yuqori texnologiyalarga asoslangan, omon qolish uchun olib boriladigan urush haqida gapira olamiz. Bunda maksimal foyda olish uchun minimal inson resurslari, iqtisodiy vositalar ishlatiladi. Demografiya va iqtisodiyot sharoitida Ukraina boshqa urushga qodir emas va bu haqda o‘ylashning ham hojati yo‘q, dedi sobiq bosh qo‘mondon.
2023-yil noyabr oyida Ukraina prezidenti Vladimir Zelenskiy Ukraina hozircha 1991-yilgi chegaralarni qaytarib olish uchun yetarli kuchga ega emasligini bildirgandi. U Qrimni diplomatik yo‘l bilan qaytarishga tayyor ekanini ma’lum qilgan.
Izoh (0)