Rossiya prezidenti Vladimir Putinning maslahatchisi Anton Kobyakov Sankt Peterburg xalqaro yuridik forumida SSSR huquqiy jihatdan hozir ham mavjud ekanini aytgandi. “Milliy tiklanish” demokratik partiyasi fraksiyasi rahbari Alisher Qodirov bunga javob qaytardi.
Uning so‘zlariga ko‘ra, 1922-yilda Sovetlar qurultoyi orqali tuzilgan SSSRni faqat shu qurultoy tarqatishi mumkin edi. 1991-yildagi tarqatish jarayonida esa bu tartib buzilgan.
“Agar qonuniy tartib buzilgan bo‘lsa, konstitutsiyaviy huquq mutaxassislari ta’kidlaganidek, SSSR yuridik jihatdan mavjud bo‘lib chiqadi”, degan edi Anton Kobyakov.
Kobyakov SSSR tarqatilishi haqidagi “Belovejsk kelishuvi” haqida ham to‘xtalib, bu kelishuvni keyinchalik RSFSR, USSR va BSSR Oliy Kengashlari tasdiqlaganini, lekin bu umuman ularning vakolatiga kirmaganini qayd etib, “huquqiy nuqtayi nazardan g‘alati holat”, deb atagan. Shuningdek, agar SSSR hali ham mavjud bo‘lsa, mantiqan, huquqiy nuqtayi nazardan qaralganda Ukraina inqirozi bu ichki jarayon hisoblanishini bildirgan.
Oliy Majlis Qonunchilik palatasi deputati, “Milliy tiklanish” demokratik partiyasi fraksiyasi rahbari Alisher Qodirov bunga javoban o‘zbek xalqi 1990-yilda qabul qilingan 1409-I sonli SSSR qonunining 2-moddasiga muvofiq SSSRdan ajralib chiqishga qaror qilganini va kim istasa, istaganicha muhokama qilishi mumkinligini, bu qaror to‘g‘ri va o‘zgarmas ekanligini o‘zining Telegram kanalida yozib qoldirdi.
“Rossiya esa shamollaganlar va xayolparastlaridan tezroq qutulishi kerak. Bu dard gazak olib, tobora og‘ir oqibatlardan darak bermoqda. Ukraina egoist, tarqoq va zaif G‘arbga tayanib xato qildi, lekin bir-biriga tayanayotgan Markaziy Osiyo, qolaversa, butun turkiy dunyoni hisobga olmaganlar xato qiladi”, deydi Alisher Qodirov.
Rossiya prezidenti Sovet ittifoqi endi yo‘qligini, o‘tmishni qaytarib bo‘lmasligini, qolaversa, Rossiyaga endi buning keragi yo‘qligini o‘z bayonotlarida ta’kidlab o‘tgan. Alisher Qodirov Vladimir Putinning fikrini qo‘llab-quvvatlashi, qalban rus dunyosiga taalluqli bo‘lganlar hududi yetarlicha ko‘p bo‘lgan Rossiyada xotirjam va baxtli yashashlari kerakligini bildirdi.
Izoh (0)