Isroilning sobiq bosh vaziri Ehud Olmert yahudiy davlati G‘azoda harbiy jinoyatlar sodir etayotganini aytdi. U minglab begunoh falastinliklar va ko‘plab isroillik askarlar halok bo‘layotganini ta’kidladi. Bu haqda The Guardian xabar berdi.
Olmert 2006-yildan 2009-yilgacha Isroil bosh vaziri sifatida faoliyat yuritgan. U Isroil hukumati hozirda “maqsadsiz yoki aniq rejalashtirilmagan va muvaffaqiyatga erishish imkoniyati bo‘lmagan urush olib borayotgani”ni aytdi.
Isroil davlati tashkil topganidan beri hech qachon bunday urush olib bormagan... Binyamin Netanyaxu boshchiligidagi jinoiy guruh Isroil tarixida va bu sohada misli ko‘rilmagan pretsedent yaratdi, dedi Ehud Olmert.
U so‘nggi haftalarda “Falastin aholisi o‘rtasidagi qurbonlar soni dahshatli miqyosga” yetganini ta’kidladi.
G‘azodagi so‘nggi operatsiyalarning urushning qonuniy maqsadlari bilan hech qanday aloqasi yo‘q. Hozirgi paytda bu shaxsiy siyosiy urushga aylangan. Uning bevosita natijasi – G‘azoni gumanitar falokat zonasiga aylanishidir.
Biz hozir G‘azoda amalga oshirayotgan harakatlar vayronkor urushdir: tinch aholini saralamay, cheksiz, shafqatsiz va jinoiy tarzda o‘ldirish. Bu ongli ravishda, yovuzlik bilan, g‘arazli niyatda, mas’uliyatsizlarcha belgilangan davlat siyosatining natijasidir. Ha, Isroil harbiy jinoyatlar sodir etmoqda, dedi Ehud Olmert.
Olmert o‘tgan hafta BBC’ga bergan intervyusida davom etayotgan mojaroni “maqsadsiz urush — garovga olinganlarning hayotini qutqara oladigan biror narsaga erishish imkoniyati yo‘q urush” deb ta’riflagan. Uning mazkur bayonoti Isroilda janjal keltirib chiqargan. O‘ta o‘ng partiyalar uning so‘zlarini qattiq tanqid qilgan.
Demokratlar partiyasi rahbari, Isroil armiyasi shtabi boshlig‘ining sobiq o‘rinbosari Yair Golan "sog‘lom fikrli mamlakat tinch aholiga qarshi urushmaydi, chaqaloqlarni xobbi sifatida o‘ldirmaydi va aholini haydab chiqarishni o‘z oldiga maqsad qilib qo‘ymaydi” degan.
Isroil tashqi ishlar vaziri Gideon Saar esa Olmert va Golanni “Isroil davlati va armiyaga qarshi diplomatik kampaniyada, targ‘ibot urushida faol ishtirok etganlikda” ayblagan. Ta’lim vaziri Yoav Kish Olmert va Golan “xalqaro maydonda Isroilning obro‘sini to‘kuvchi radikal so‘l xor”ga qo‘shilganini ta’kidlagan.
Izoh (0)