800 dan ortiq huquqshunos, akademik va sobiq sudya Buyuk Britaniyani Isroil hukumati va vazirlariga qarshi sanksiyalar joriy etishga, G‘azoda genotsidni to‘xtatish va jazolash choralarini ko‘rishga chaqirdi. Bu haqda Al Jazeera xabar berdi.
26-may kuni Buyuk Britaniya bosh vaziri Kir Starmerga yo‘llangan ochiq maktubda G‘azoda genotsid sodir etilayotganligi yoki uning jiddiy xavfi mavjudligi, shuningdek, harbiy va insoniyatga qarshi jinoyatlar hamda xalqaro gumanitar huquq buzilishlari ta’kidlangan.
Maktubda Isroilning G‘azo sektorini butunlay nazoratga olish va HAMASni yo‘q qilmaguncha hududni bosib olish rejalari ham tilga olingan. Yuqori lavozimli huquqshunoslar tomonidan imzolangan maktubda, Buyuk Britaniya, Fransiya va Kanada rahbarlarining G‘azodagi vaziyat bo‘yicha bayonoti e’tirof etilib, hukumatlarning choralar ko‘rishga tayyorligi olqishlangan.
Shuningdek, Britaniya hukumati xalqaro huquqiy majburiyatlarga rioya qilishga, G‘azoda o‘t ochishni darhol to‘xtatishga va falastinliklarga yordamni to‘siqsiz tiklashga chaqirilgan. Noqonuniy harakatlarda gumon qilingan Isroil rasmiylariga sanksiyalar, savdo aloqalarini ko‘rib chiqish, savdo sanksiyalari joriy etish va Britaniya–Isroil hamkorligini chuqurlashtirish rejasini to‘xtatish so‘ralgan.
Maktubda, shuningdek, Britaniyadan Xalqaro jinoiy sud (XJS) tomonidan chiqarilgan Isroilga qarshi hibsga olish orderlarini bajarish majburiyatini tasdiqlash talab qilingan. XJS bosh vazir Binyamin Netanyaxu va sobiq mudofaa vaziri Yoav Gallantni G‘azodagi harbiy va insoniyatga qarshi jinoyatlari uchun hibsga olishga order bergan, mamlakat esa genotsidda ayblangan.
Ma’lumot uchun, Buyuk Britaniya yaqinda Isroil bilan yangi savdo bitimi bo‘yicha muzokaralarni to‘xtatgan. 2024-yilgi ochiq xatda esa Buyuk Britaniya Isroilni qurollantirish orqali xalqaro huquqni buzayotgani tanqid qilingan.
Izoh (0)