Gollivud yulduzlari faqat ekranda emas, ish joyida ham o‘ziga xosliklari bilan ajralib turadi. Gollivudda “rayder” deb ataluvchi maxsus talablar ro‘yxati orqali ular suratga olish guruhi va prodyuserlarga o‘ziga xos sharoitlar yaratishni buyuradi. Ayrim talablar shunchalik noodatiy bo‘ladiki, hatto Gollivud olamida ham ajablanishga sabab bo‘ladi.
Jorj Kluni
Buyuk Britaniyada suratga olingan kosmos mavzusidagi “Gravitatsiya” filmida ikkinchi darajali rol o‘ynagan Jorj Kluni hashamatdan voz kechishni istamadi. Uni jalb qilish uchun nafaqat katta gonorar to‘langan, balki u yashashi uchun shaxsiy plyajga ega uy qurilgan. Britaniya nashrlariga ko‘ra, uning treyleri yonida sun’iy bog‘, jakuzi, terrasali dam olish maskani va basketbol maydonchasi barpo etilgan. Mazkur “kurort” kinokompaniyaga ancha qimmatga tushgan.
Uill Ferrell
Mashhur komediya aktyori Uill Ferrell kinoda ham, hayotda ham hazilkash. “Teleboshlovchi” filmidagi roli bilan tanilgan aktyorning suratga tushish uchun qo‘ygan shartlari go‘yoki komediyadan olingandek. U rejissyorlardan uch g‘ildirakli elektrosamokat, sun’iy daraxt, harakatlanadigan zinapoya va kamalak talab qilgan.
Kianu Rivz
Kamtarligi bilan tanilgan Kianu Rivzning ham o‘ziga xos sharti bor. 2000-yillarning boshida aktyorning ishtirokidagi sahnaga montaj orqali ko‘z yoshi qo‘shilgan. Bu unga yoqmaganidan so‘ng, Rivz studiyalarga o‘z obrazini montaj qilishni qat’iyan man etgan. Aktyor o‘zidagi faqat kichik texnik tuzatishlarga ruxsat beradi.
Semyuel L. Jekson
Mashhur aktyor Semyuel L. Jekson uchun golf nafaqat hobbi, balki hayotining ajralmas qismidir. Shuning uchun aktyor suratga tushayotgan film rahbari unga haftasiga kamida ikki marta golf o‘ynash imkoniyatini berishi shart. Shu sababli tashkilotchilar aktyorga golf maydoniga yaqin joydan boshpana beradi yoki unga golf klubiga a’zolik kartasini beradi.
Geri Byuzi
“Kuigli” filmida rol o‘ynagan Geri Byuzi suratga olish maydonchasidagi hamkasblarini hayratda qoldirgan. Filmda uning qahramoni vafot etgach, jannatga tushadi. Byuzi esa avval klinik o‘limni boshidan kechirgani uchuna jannat qanday bo‘lishi kerakligini “aniq bilishini” da’vo qilgan.
U jannatda oynalar bo‘lmasligi va mebel butunlay boshqacha bo‘lishi lozimligini uqtirgach, rejissyor va rassomlar ishlar kechikmasligi uchun aktyorning talablarini inobatga olishga majbur bo‘lgan.
Uill Smit
“Qora libosli odamlar 3” filmini suratga olish vaqtida Uill Smit allaqachon superyulduz maqomida edi va istaganini talab qila olardi. U ikkita katta va barcha sharoitlarga ega mobil (harakatlanadigan) uyni so‘ragan: biri ko‘p yotoqxonali, hojatxonali, barli, yordamchilar uchun ofisli va kinoekranli bo‘lgan; ikkinchisi esa to‘liq trenajyor zali sifatida jihozlangan. Qiziq tomoni, suratga olish maydoni aktyorning uyiga yaqin joyda bo‘lgan.
Peris Hilton
“Zahiradagi politsiyachilar” komediyasida epizodik rolga rozilik bildirgan Peris Hilton va uning jamoasi ijodiy guruhga o‘zining talablar ro‘yxatini taqdim etgan. Ulardan eng ajablanarlisi tirik lobsterlar solingan akvarium bo‘lgan. Agar aktrisa istasa, sevimli taomini bevosita ish jarayonida iste’mol qilishi mumkin bo‘lishi shart edi. Shu sababli Hiltonga alohida oshpaz ham yollangan.
Sheron Stoun
“Asosiy instinkt” filmining davomi bo‘yicha muzokaralarga Sheron Stoun juda jiddiy yondashgan. Katta gonorardan tashqari prezident darajasidagi mehmonxona nomeri, qurollangan qo‘riqchilar, shaxsiy haydovchi, bolalar uchun enagalar va shaxsiy yordamchilarni talab qilgan.
Yana bir muhim talab — hamkasblarning hech biri uning yonida chekmasligi kerak edi. Bundan tashqari, u filmda kiygan barcha liboslar va taqinchoqlarni o‘zida qoldirish huquqini ham olgan.
Izoh (0)