Neyrofarqlilik — bu inson miyasi boshqalarnikidan farqli ishlashini ifodalovchi atama. Bunga autizm, diqqat yetishmovchiligi va giperfaollik sindromi, bipolyar buzilish kabi holatlar kiradi. Avval bu kabi holatlar og‘ir kasallik deb hisoblangan. Hozirgi kunda mutaxassislar ularni kasallik deb emas, balki inson xususiyati deb baholamoqda. Quyida keltirilgan mashhur insonlar o‘zining neyrofarqliligi bilan muvaffaqiyatga erishgan.
Bella Remsi
Britaniyalik aktrisa Bella Remsi o‘zida autizm borligini “Oxirimizdan biri” serialining birinchi mavsumi suratga olinayotganda bilib qolgan. Suratga olish guruhi a’zolaridan biri unga muayyan belgilar borligini aytib, shifokorga murojaat qilishni tavsiya etgan.
Bella bu tashxisni yengillik bilan qabul qilgan, chunki u bolaligidan o‘zini boshqalardan farqli deb hisoblagan. Bu tashxis unga o‘zini yaxshiroq tushunishga yordam bergan. Uning so‘zlariga ko‘ra, autizm aktyorlik mahoratiga ham ijobiy ta’sir ko‘rsatgan.
Bella “Taxtlar o‘yini” serialida Liana Mormont rolini ijro etib mashhur bo‘lgan. Keyin “The Last of Us” serialida bosh qahramon Ellie rolini o‘ynagan. Bu rol unga “Emmi” va “Oltin globus” mukofotlariga nomzodlik olib kelgan.
Den Eykroyd
Mashhur aktyor, musiqachi, ssenarist va prodyuser Den Eykroyd intervyularidan birida bolaligida unda turett sindromi tashxisi qo‘yilganini tan olgan. Den bu sababli odamlar orasida yurishga qiynalgan, ammo davolanish orqali bu belgilar yo‘qolgan.
Keyinchalik u o‘zini kuzatib, unda asperger sindromi (hozirda bu yuqori funksional autizm deb ataladi) borligiga ishonch hosil qilgan. U g‘ayritabiiy narsalarga qiziqqani tufayli “Arvoh ovchilari” filmini yaratgan va bosh rolni o‘zi ijro etgan.
Set Rogen
2021-yilda kanadalik aktyor va ssenarist Set Rogen amerikalik senator Ted Kruz o‘rtasida nizo chiqdi. O‘z xabarlaridan birida u o‘zida turett sindromining yengil shakli borligini aytib o‘tdi. Unga ko‘ra, bu tashxis faqat unda emas, balki oilasining boshqa a’zolarida ham mavjud. Setning aytishicha, u vaqti-vaqti bilan tanadagi ixtiyorsiz qaltirashlar yoki tortishishlarni boshdan kechiradi. Biroq, bu holat unga Gollivudda muvaffaqiyatli karyera qurishga umuman xalal bermagan.
Set Rogenni “SuperPertslar”, “This Is the End”, “Intervyu”, “Stiv Jobs” kabi filmlarda ko‘rish mumkin. U uzoq yillik do‘sti va hammuallifi Evan Goldberg bilan birga “The Boys” franshizasini yaratishda ishtirok etgan. Hozir esa ular Gollivud hayoti va kinematografiya haqida “Kino studiyasi” nomli satirik loyihani chiqardi — bu yerda Set Rogen bosh rolni ham o‘ynagan.
Entoni Xopkins
Ikki karra “Oskar” sovrindori Entoni Xopkinsda autizm spektriga kiruvchi bir nechta alomatlar bor. U bolaligida disleksiya (o‘qish va yozishni o‘zlashtirishda qiyinlashtirish) bilan qiynalgan, bu esa maktabda muammolarga sabab bo‘lgan. Natijada u maktabni tashlab, san’at bilan shug‘ullanishga qaror qilgan.
Xopkins doimo yolg‘izlikni afzal ko‘rgan, katta guruhlardan chetda yuradi va rollariga chuqur kirib ishlaydi. U aktyorlikdan tashqari musiqa va rassomchilik bilan ham shug‘ullanadi.
Ketrin Zeta-Jons
Ketrin Zeta-Jonsda 2011-yilda bipolyar buzilishning II turi aniqlangan. Bu kasallikda odam depressiyaga tushib, keyin esa faol, uyqusiz holatga o‘tadi.
O‘sha yillarda eri Maykl Duglas tomoq saratoniga chalingan edi. Unga yordam berish paytida Ketrin o‘zining ruhiy holati yomonlashganini sezmay qolgan. 2013-yilda er-xotin ajrashmoqchi ham bo‘lishgan, lekin oxir-oqibat muammolarni yengib, oila saqlanib qolgan.
Ketrin bu holatni yashirmagan, u intervyularida bu haqida ochiq gapirib keladi. Uning fikricha, muammolar haqida gapirishdan qo‘rqmaslik kerak — eng yomoni bu yordam ololmaslikdir.
Ventvort Miller
Odatda autizm bolalikda aniqlanadi. Ammo aktyor Ventvort Millerda bu tashxis 49 yoshida qo‘yilgan. U “Panjara ortida”, “Flesh” va “Ertangi kun afsonalari” seriallarida rol o‘ynagan.
Yoshlik yillarida u depressiya va o‘z joniga qasd qilish istagi bilan kurashgan. Bu ruhiy holat uni odamlar bilan muloqotda qiynagan va sog‘lig‘iga ham ta’sir qilgan. Katta bo‘lganida u o‘zida autizm belgilarini payqagan. Shifokorlar ham bu tashxisni tasdiqlashgan.
Ventvort boshida bu xabarni qabul qilish qiyin bo‘lganini aytadi. Biroq u autizm o‘z hayotining bir qismiga aylanganini tan olgan.
Izoh (0)