Tadbirkor Marat Hamdamov aktrisa Sabrina Jabborovaning unga uy berilmagani haqidagi so‘zlariga munosabat bildirdi.
“Bir necha oylar oldin ijtimoiy tarmoqlarda aynan shu qizimizga doir videolar tarqaldi, shu paytda Turkiyada ekanlar, yordam berish niyatida ekanligimni aytib Telegram orqali bog‘landim, O‘zbekistonga qaytganingizda yozib qo‘ying, dedim.
Oradan biroz vaqt o‘tdi, ular O‘zbekistonga qaytib keldi va menga Telegram orqali yozdilar, pasport nusxalarini yuborib qo‘yishlarini so‘radim.
O‘zi bunday narsalarga, ‘teatr’ va piarlarga toqatim yo‘q, aslida, xonadonni berish jarayonini ham sir saqlagandik, lekin ko‘pchilik noto‘g‘ri tushungani uchun hozir izoh berib o‘tishga majburman.
Xullas, menga pasport nusxalarini yubordilar, lekin biz o‘sha paytda 10-, 11-, 12-may kunlari kompaniyamiz tomonidan aksiya eʼlon qilgan edik, shu sababli men bandroq edim. Mening aybim Sabrina yuborgan SMS-xabarni 1 kundan keyin o‘qidim. Keyin telefon raqamlari yo‘qligi uchun telefon raqamingizni bering, sizga sotuv bo‘limi xodimlari aloqaga chiqadi, deb so‘radim. Shu savolni berganimdan keyin menga javoban: bu advokatimning telefon raqami, nima savolingiz bo‘lsa, advokatim orqali aloqaga chiqing, degan xabar keldi. Shunda ozgina hayratlandim, nega advokat, deb tushunmadim.
O‘zi aslida Alloh ko‘nglingizga solmasa, birovga ming so‘m ham bera olmaysiz, ammo Alloh ko‘nglingizga solsa, oxirgi narsangizni ham berishiningiz mumkin. Shu uy singlimizga nasib qilmagan ekan.
Men shu kuni ertalab intervyuni ko‘rib qoldim, bu intervyuda qandaydir notanish ayol go‘yoki mening piar qilganimni iddao qilibdi va shunday muomala qilishyaptiki, xuddi men majburman ularga uy berishga, vaholanki, mening ulardan qarzim yo‘q, shunchaki yordam tariqasida uy bermoqchi edim.
Keyin bundan tashqari, ko‘p narsalar eshitdim, unga chuqurlashmoqchi emasman. Xalq tomonidan yig‘ib berilgan pullar o‘zboshimchalik bilan boshqa tomonga sarflanganini eshitganimdan keyin bularning ichidagi g‘azab, menga bo‘lgan noto‘g‘ri muomalasini ko‘rib xonadonni bermaslikka qaror qildim. Chunki mening fikrim bo‘yicha ehson qilishga arziydigan inson deb topmadim. Bu videoni ko‘rib xafa bo‘lmanglar, Alloh nasib qilmabdi.
Balki ozgina sabrliroq bo‘lganingizda, raqamingizni so‘raganimda berganingizda, hammasi boshqacharoq bo‘lar edi. Endi o‘zingizni shunday tutyapsizki, xuddiki siz Gollivud yulduzisiz, biz sizga uy berganimiz uchun bizning biznesimiz zo‘r bo‘lib ketadi va biz qanaqadir xuddi reklama uchun qilib olganmiz.
Aslida, men siz haqingizda gapirishni ham niyat qilmaganman va albatta men piar qilishni istaganimda, uyni sizga tantanali ravishda topshirardim, biz umuman bu haqda gapirmadik, sir saqladik, shunchaki yordam uchun edi. Lekin sizning qilayotgan muomalangiz mening ko‘nglimni sovitdi va uyni bermaslikka qaror qildim.
Lekin shu singlimiz uchun atalgan uyni, Xudo xohlasa, iyun oyida eng muhtoj oilaga taqdim qilaman. Uyni boquvchisini yo‘qotgan, uysiz, voyaga yetmagan yetim farzandlari bo‘lgan yolg‘iz onaga topshiraman.
Mayli, xalq meni lafzsizlikda ayblasin. Lekin to‘g‘risini aytadigan bo‘lsam, umrimda birinchi marta mana shu va’da qilgan ehsonimni bermaganim uchun maza qildim, chunki Alloh yuzingizni ochdi”, deydi tadbirkor.
Avvalroq Sabrinaning advokati Zeboxon Komilova tadbirkor Marat Hamdamov tomonidan ehson qilingan uy Sabrinaga hali berilmagani haqida aytib o‘tgan edi:
“Internetdagi hamma gaplarga ham ishonib bo‘lmaydi, Marat Xayrullayevichga Sabrinaning telefonidan bog‘lanmoqchi bo‘ldik, afsuski, uni qora ro‘yxatga kirgizib qo‘yishibdi, natijada ulana olmadik. Bu Marat Xayrullayevich shunchaki internetda mashhurlikka erishish uchun qilingan piar hisoblanadi”, degan edi advokat.
15-may kuni Jinoyat ishlari bo‘yicha Mirzo Ulug‘bek tumani sudida Ozoda Nursaidova qo‘shig‘iga klip suratga olinayotganda sodir bo‘lgan mudhish avtohalokatning sud jarayonlari boshlandi.
“Dilbarim” qo‘shig‘iga klip suratga olish jarayonida Sabrina Jabborovani 16 yoshli aktrisa “Gelik”da bosib ketgan edi. Sabrina Toshkent shahrida muvaffaqiyatsiz operatsiya qilingan, shundan so‘ng bir oyog‘i kalta bo‘lib qolgan edi. U o‘zi bilan yuz bergan voqea haqida ijtimoiy tarmoqlarda so‘zlab berganidan keyin ko‘ngillilar tomonidan unga jami 367 million so‘m yig‘ib berilgan edi. Shundan so‘ng aktrisa Istanbul shahrida qaytadan operatsiya qilinib, to‘g‘ri yura boshladi.
Izoh (0)