Yaponiyada keksalar uchun mo‘ljallangan noodatiy ish turi — “ijaraga buvi” xizmati tobora mashhur bo‘lib bormoqda. Bu tashabbus inflyatsiya va yashash xarajatlarining qimmatlashib ketgan vaqtda yoshi ulg‘aygan ayollar uchun qo‘shimcha daromad topish imkonini bermoqda.
Soatiga 3000 yen (taxminan 20 AQSH dollari) evaziga mijozlarga 60 yoshdan 94 yoshgacha bo‘lgan buvilar xizmat ko‘rsatadi. Bu narx joylashuv, vaqt va bajariladigan ish turiga qarab o‘zgarishi mumkin. Ijaraga olingan buvilar pazandalikni o‘rgatadi, uy ishlariga ko‘maklashadi va ruhan qo‘llab-quvvatlovchi inson vazifasini bajaradi.
Shuningdek, buvilar bolalarga qarash, oiladagi kelishmovchiliklarni hal etishda vositachilik qilish, juftliklar ajrashayotgan paytda tayanch bo‘lish kabi hayotiy vaziyatlarga ham jalb qilinadi.
“OK Obaachan” (“Xo‘p buvijon”) nomli bu xizmat ilk bor 2011-yilda Client Partners kompaniyasi tomonidan yo‘lga qo‘yilgan. Ayollar uchun turli xizmatlarni taklif qiluvchi ushbu kompaniya uyni tartibga keltirishdan tortib, suhbatdosh bo‘lishgacha bo‘lgan ko‘plab yo‘nalishlarda ish bilan ta’minlaydi. Mijozlar xizmat narxidan tashqari buvining yo‘l xarajatlarini qoplash uchun ham 3000 yen to‘laydi.
Yaponiya hukumati ma’lumotiga ko‘ra, o‘tgan yili mamlakatdagi keksalarning qariyb chorak qismi ish bilan band bo‘lgan. 2024-yil sentyabr holatiga ko‘ra, 65 yoshdan oshganlar soni 36,25 million kishiga yetgan. Bu umumiy aholining uchdan bir qismiga teng.
Aholining tez qarib borayotgani mamlakatda demografik inqirozga sabab bo‘lmoqda. Bunga qo‘shimcha ravishda yashash xarajatlarining oshib borishi ham aholining kun kechirishini qiyinlashtirmoqda.
Oziq-ovqat mahsulotlari narxi oshib ketgani, may oyida o‘rtacha ish haqi o‘tgan yilga nisbatan 2,9 foizga kamaygan. Shu sababli keksa yoshida ham yaponiyaliklarning yarmidan ko‘pi ishlashga majbur bo‘lmoqda. Ba’zilar esa tirikchilik uchun kutilmagan qarorlarni qabul qilishga majbur bo‘lmoqda. Masalan, CNN’ning xabar berishicha, 81 yoshli bir yapon ayol nafaqasi kundalik xarajatlarga yetmagani sababli ataylab do‘kondan ovqat o‘g‘irlagan. U shu yo‘l orqali ayollar qamoqxonasida bepul ovqatlanish va tibbiy xizmatdan foydalanish imkonini qo‘lga kiritgan.
Izoh (0)