Японияда кексалар учун мўлжалланган ноодатий иш тури — “ижарага буви” хизмати тобора машҳур бўлиб бормоқда. Бу ташаббус инфляция ва яшаш харажатларининг қимматлашиб кетган вақтда ёши улғайган аёллар учун қўшимча даромад топиш имконини бермоқда.
Соатига 3000 ен (тахминан 20 АҚШ доллари) эвазига мижозларга 60 ёшдан 94 ёшгача бўлган бувилар хизмат кўрсатади. Бу нарх жойлашув, вақт ва бажариладиган иш турига қараб ўзгариши мумкин. Ижарага олинган бувилар пазандаликни ўргатади, уй ишларига кўмаклашади ва руҳан қўллаб-қувватловчи инсон вазифасини бажаради.
Шунингдек, бувилар болаларга қараш, оиладаги келишмовчиликларни ҳал этишда воситачилик қилиш, жуфтликлар ажрашаётган пайтда таянч бўлиш каби ҳаётий вазиятларга ҳам жалб қилинади.
“ОK Obaachan” (“Хўп бувижон”) номли бу хизмат илк бор 2011 йилда Client Partners компанияси томонидан йўлга қўйилган. Аёллар учун турли хизматларни таклиф қилувчи ушбу компания уйни тартибга келтиришдан тортиб, суҳбатдош бўлишгача бўлган кўплаб йўналишларда иш билан таъминлайди. Мижозлар хизмат нархидан ташқари бувининг йўл харажатларини қоплаш учун ҳам 3000 ен тўлайди.
Япония ҳукумати маълумотига кўра, ўтган йили мамлакатдаги кексаларнинг қарийб чорак қисми иш билан банд бўлган. 2024 йил сентябрь ҳолатига кўра, 65 ёшдан ошганлар сони 36,25 миллион кишига етган. Бу умумий аҳолининг учдан бир қисмига тенг.
Аҳолининг тез қариб бораётгани мамлакатда демографик инқирозга сабаб бўлмоқда. Бунга қўшимча равишда яшаш харажатларининг ошиб бориши ҳам аҳолининг кун кечиришини қийинлаштирмоқда.
Озиқ-овқат маҳсулотлари нархи ошиб кетгани, май ойида ўртача иш ҳақи ўтган йилга нисбатан 2,9 фоизга камайган. Шу сабабли кекса ёшида ҳам японияликларнинг ярмидан кўпи ишлашга мажбур бўлмоқда. Баъзилар эса тирикчилик учун кутилмаган қарорларни қабул қилишга мажбур бўлмоқда. Масалан, CNN’нинг хабар беришича, 81 ёшли бир япон аёл нафақаси кундалик харажатларга етмагани сабабли атайлаб дўкондан овқат ўғирлаган. У шу йўл орқали аёллар қамоқхонасида бепул овқатланиш ва тиббий хизматдан фойдаланиш имконини қўлга киритган.
Изоҳ (0)