Rossiya prezidenti Vladimir Putin AQSH prezidenti Donald Tramp va Eron vakillari bilan o‘tkazilgan yopiq muzokaralar davomida Eronning uranni boyitishdan butunlay voz kechishini ko‘zda tutuvchi yadro kelishuviga o‘z qo‘llab-quvvatlashini bildirdi. Bu haqda Yevropa va Isroil rasmiylariga tayanib, Axios nashri xabar berdi.
“Putin ‘nol boyitish’ g‘oyasini qo‘llab-quvvatlaydi. U eronliklarni amerikaliklar bilan muzokaralarda ijobiy natijaga erishish uchun shu yo‘nalishda ishlashga undadi. Eronliklar esa bu variantni ko‘rib chiqmasliklarini aytishdi”, deydi Yevropadagi manbalardan biri.
Boshqa manbalar aniqlashtirishicha, Rossiya prezidenti so‘nggi haftalar ichida Tehron hukumatiga bunday chaqiriq bilan “bir necha bor” murojaat qilgan.
Isroillik rasmiy shaxs o‘z mamlakati rahbariyati bundan xabardor ekanini bildirgan. Shuningdek, Putin yaqinda telefon orqali suhbatlashganda Fransiya prezidenti Emmanuel Makronga Eron yadro dasturi bo‘yicha o‘z nuqtai nazarini bayon etgan.
Axios ma’lumotlariga ko‘ra, Rossiya Erondan boyitilgan uran zaxiralarini olib chiqib ketishni va buning evaziga atom elektr stansiyalari uchun tarkibida 3,67 foiz uran bo‘lgan yoqilg‘i, shuningdek, ilmiy maqsadlar uchun cheklangan miqdorda 20 foizlik uran yetkazib berishni taklif qilmoqda.
Ukrainaga qarshi urushda Rossiya Federatsiyasi bilan hamkorlik qilishiga qaramay, Eron Isroil bilan munosabatlar keskinlashgan paytda Moskva yetarlicha faol qo‘llab-quvvatlamaganidan norozi bo‘lgan.
Isroil 13-iyun kechasi Eronga zarbalar berishni boshladi. Ularning maqsadi Tehronning yadro va raketa dasturlari bilan bog‘liq obyektlar edi. Bir sutkadan kamroq vaqt o‘tib, Eron javob hujumini amalga oshirdi. 22-iyun kechasi AQSH Qurolli kuchlari Eronning uchta yadroviy obyektiga hujum qildi, 23-iyun kechqurun esa Tehron Qatardagi Yaqin Sharqning eng yirik Al-Udeyd Amerika havo bazasiga raketa zarbalari berdi. Keyinroq AQSH prezidenti Donald Tramp Isroil va Eron o‘t ochishni to‘xtatish rejimiga kelishib olganini ma’lum qildi. Bu kelishuv 24-iyundan kuchga kirdi.
Izoh (0)