26—30-may kunlari “Xalqlar do‘stligi” san’at saroyida Jaloliddin Ahmadaliyevning “Shunday o‘tib ketmasmiz” nomli konsert dasturi bo‘lib o‘tmoqda. “Daryo” jamoasi to‘liq jonli ijroda o‘tayotgan konsertda qatnashib, reportaj tayyorladi.

Konsertda qiziqchi Jamshidbek Normatov boshlovchilik vazifasini o‘z zimmasiga oldi. Farg‘onalik ikki ijodkor konsertlarda bir-birini shu tarzda qo‘llab-quvvatlaydi.

— Kechagi seansdan u qadar qoniqmagandim. Bugungi kundan ko‘nglim to‘lyapti, hammasi zo‘r. Konsertda 15 tacha premyera qo‘shiq bor, qolgani eski qo‘shiqlar. Kecha jami 34 ta qo‘shiq aytibman. Dastur ham uch soatga yaqin davom etdi. Xohlagan qo‘shig‘ingizni aytib beraman, deb qo‘yganim uchun shunday bo‘ldi, dedi Jaloliddin Ahmadaliyev.

Xonandaning so‘zlariga ko‘ra, konsert to‘ydek o‘tmoqda. U hali konsertga tushmagan muxlislariga, albatta, kelishni tavsiya qildi.

— Konsert kichik to‘ydek o‘tyapti, to‘rt yildan buyon shunday. To‘ylarda ham shunday-ku, muxlislar falon qo‘shiqni aytib bering, deb ketadi. Faqat “qistir”i yo‘q. Farqi shunda.

Konsertga bir hafta tayyorlandim. Undan oldin ham tayyorgarliklar bo‘ldi, faqat chala bo‘lardi. To‘ydan kelib ozgina tayyorlanardik, dedi xonanda.

Jaloliddin Ahmadaliyev O‘zbekistonda ilk bor sun’iy intellekt yordamida tarixiy klip yaratayotgan birinchi ijodkor bo‘ladi. Uning Vatan haqidagi qo‘shig‘i klipi tez kunlarda premyera qilinadi.

— Klip nomi “Temur bo‘ling” deb nomlanadi. Amir Temur nomidan biz farzandlarga aytilgan so‘zlar bo‘ladi. Insonni ruhlantirib, vatanga muhabbatini oshiradigan qo‘shiq bo‘lgan.

Qo‘shiq klipi ustida uzoq o‘ylandik va sun’iy intellekt yordamida yaratishga qaror qildik. Boshqa yo‘nalishda sun’iy intellekt yordamida yaratilgan kliplar bordir, lekin tarixiysini birinchi biz qilyapmiz, menimcha. Klipda Amir Temur va boshqa tarixiy shaxslar jonlanadi.

Aslida klip ancha avval premyera bo‘lishi kerak edi, ammo ba’zi kamchiliklari sabab chiqarolmay turibmiz. Xarajati uchun uncha ko‘p mablag‘ ketmadi. U grafik dizaynerning ishiga qarab baholanar ekan. Qimmat bo‘lmasa-da, ko‘nglimizdagidek qilib ideal qilib beryapti, deydi Jaloliddin Ahmadaliyev yangi klipi haqida.

Konsert yorqin lahzalarga boy o‘tdi. Muxlislar sho‘x qo‘shiqlarga raqsga tushib, og‘ir qo‘shiqlarda ko‘z yoshlarini to‘xtatolmadi. Ona haqida kuylangan qo‘shiq barchaga birdek yoqqan va yig‘latgani bo‘ldi.

Konsertdan to‘liq reportajni Daryo Lifestyle YouTube sahifasida tomosha qiling.