O‘zbekistonning olis va chekka hududlardagi mahallalarda xorijiy tillarga o‘qitish bo‘yicha ta’lim xizmatlarini ko‘rsatishni tashkil etuvchi yoshlarga foizsiz qarz ajratiladi.
10-iyul kuni “Yoshlar tadbirkorligini hamda ularning bandligini ta’minlashga qaratilgan biznes loyihalarni qo‘llab-quvvatlash va ularni moliyalashtirish tartibini belgilash chora-tadbirlari to‘g‘risida”gi Vazirlar Mahkamasi qarori qabul qilindi. Unda Yoshlar tadbirkorligini rivojlantirish maqsadli jamg‘armasi mablag‘lari hisobidan biznes loyihalarni moliyalashtirish tartibini belgilovchi nizom tasdiqlandi.
Unga ko‘ra, olis va chekka hududlardagi mahallalarda xorijiy tillarga o‘qitish bo‘yicha ta’lim xizmatlarini ko‘rsatishni tashkil etish uchun BHMning 320 barabarigacha miqdorida foizsiz qarz (ssuda) ajratiladi. O‘zbekistonda 1-avgustdan BHM 412 ming so‘m bo‘lishi hisobga olinsa, ajratiladigan ssudda miqdori 131 mln 840 ming so‘mga to‘g‘ri keladi.
Qarz quyidagi subyektlarga ajratiladi:
- yakka tartibdagi tadbirkorlik subyekti sifatida faoliyat yurituvchi yoshlarga;
- ustav fondidagi ulushi kamida 50 foizi qarz ajratilishi vaqtida yosh bo‘lgan fuqaroga (fuqarolarga) tegishli bo‘lgan yuridik shaxs tashkil etgan holda faoliyat yurituvchi tadbirkorlik subyektlariga.
Qard ajratilgandan keyin tadbirkorlik subyektining ustav fondidagi qarz ajratilishi vaqtida yosh fuqaroga tegishli bo‘lgan ulushi miqdorini qarz shartnomasi muddati davomida kamaytirish yoki boshqa shaxsga o‘tkazish mumkin emas. Bu talab buzilsa ajarartilgan qarz summasi muddatidan oldin qaytarib olinadi.
Yakka tartibdagi kadbirkor bo‘lgan yosh fuqaro yoki yuridik shaxs bo‘lgan tadbirkorlik subyektining yosh tas’sischisi xorijiy tillar bo‘yicha kamida C1 darajadagi milliy yoki unga tenglashtirilgan mos darajadagi xalqaro tan olingan sertifikatni olganiga 2 yildan oshmagan bo‘lishi talab etiladi.
Shuningdek, qarz loyiha tashabbuskori tomonidan yillik jami o‘quvchilarining kamida 20 foizi “Yoshlar daftari”ga kiritilgan yoshlar bo‘lishi sharti bilan ajratiladi.
Qarz asosiy qarzni qaytarish bo‘yicha 6 oylik imtiyozli davr bilan 3 yilgacha muddatda mablag‘larni teng ulushlarda bo‘lib-bo‘lib to‘lash sharti bilan qarz oluvchining hisobvarag‘iga o‘tkazib beriladi. Ajratilgan qarz mablag‘lari maqsadli foydalanilishi monitoring qilib boriladi.
Xorijiy tillardan C1 darajasiga ega bo‘lgan yoshlar tashabbus ko‘rsatib, olis va chekka hududlarda chet tillariga ixtisoslashgan o‘quv markazlarini ochsa, ularga foizsiz ssuda berilishi 2025-yilning fevralida Shavkat Mirziyoyevning yoshlar bilan muloqoti davomida ma’lum qilingandi. Xususiy o‘quv markazlarida xorijiy tillarni o‘rganadigan yoshlarga 6 oylik o‘qish puli ham qoplab berilishi aytilgandi.
O‘zbekistonda o‘tgan 8 yilda yosh tadbirkorlar soni 3 karra ko‘payib, bugun biznes vakillarining salkam 40 foizini yoshlar tashkil etmoqda. Ishsiz yoshlar ikki karra kamaydi. Ishsizlikdan xoli mahallalar soni 1 ming 889 taga yetdi.
Izoh (0)